ԵՐԵՎԱՆ, 20 հուլիսի-Sputnik. ՀՀ ԱԺ պատգամավոր Նիկոլ Փաշինյանը զինված խմբի կողմից գրավված ոստիկանության ՊՊԾ շենքի մոտ հավաքվածներին ասաց, որ խոսել է «Սասնա ծռեր» խմբի անդամներից մեկի` Վարուժան Ավետիսյանի հետ ու պարզել, որ նրանք սննդի խնդիր ունեն, որն օրեցօր սրվում է։ Ըստ Փաշինյանի տեղեկության` ինքը պայմանավորվել է զինված խմբի անդամների հետ, որ անձամբ կգնի անհրաժեշտ սնունդն ու իր ձեռքով կփոխանցի նրանց։
Այս հարցով պատգամավորը դիմել է Երևանի ոստիկանապետ Աշոտ Կարապետյանին, ով խոստացել է քննարկել հարցն ու անմիջապես պատասխան տալ։
«Օրվա ընթացքում մի քանի անգամ հեռախոսազրույց եմ ունեցել նրա հետ։ Ասաց, որ կպատասխանեն ինձ։ Վերջին անգամ, երբ խոսեցի Կարապետյանի հետ, ինձ հավաստիացրեց, որ «Սասնա ծռերի» անդամների սննդի խնդիրը լուծված են։ Ասաց, որ իրենք հայց են ներկայացրել իրենց կողմից վստահված մարդկանց, ու սնունդն արդեն մատակարարվում է։ Իսկ երբ խոսեցի Վարուժան Ավետիսյանի հետ, ասաց, որ տեղեկությունը չի համապատասխանում իրականությանը»,-պատմեց Փաշինյանը։
Փաշինյանի հավաստմամբ` հարցը մնում է օրակարգում, ավելին, այն արագ լուծում է պահանջում։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
