ԵՐԵՎԱՆ, 20 հուլիսի — Sputnik. Հայաստանում Ռուսաստանի արտակարգ և լիազոր դեսպան Իվան Վոլինկինը մտահոգություն է հայտնել Երևանում ՊՊԾ շենքի վրա զինված հարձակման կապակցությամբ։
«Մենք խորապես մտահոգված ենք զինված հարձակման մասին տեղեկությամբ, սակայն երկրում գտնվող ռուսաստանցիներին որևէ վտանգ ներկա պահին չի սպառնում։ Դեսպանատունը անվտանգության ուժեղացման համար լրացուցիչ միջոցներ չի ձեռնարկել», — «Իզվեստիա» թերթին տված հարցազրույցում ասել է Վոլինկինը։
Նա նշել է, որ Հայաստանի իրավապահ մարմիններն անում են հնարավորը իրավիճակի խաղաղ հանգուցալուծման համար, սակայն, ըստ նրանց հայտարարությունների, «ստեղծված իրավիճակում դա կարող է բավարար չլինել»։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
Գրոհի ժամանակ սպանվել է ոստիկանության գնդապետ Արթուր Վանոյանը, վնասվածքներ ստացել Արամ Հովհաննիսյանը, փոխգնդապետ Հրաչյա Խոստեղյանը և ենթասպա Գագիկ Մկրտչյանը։ ԱԴԾ տվյալներով` պատանդ է մնում չորս մարդ, այդ թվում` Հայաստանի փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը։
