Գևորգյանը համոզված է, որ սա Պավել Մանուկյանի ու Արայիկ Խանդոյանի կռիվը չէր, քանի որ նրանք միշտ թուրքի դեմ են կռվել և ոչ հայի։
«Նրանք հայի համար կյանք տվող են եղել, դուրս չեն եկել հայ ոստիկան, հայ մարդ սպանելու։ Գիտե՞ք ինչքան ծանր ու ցավալի է, երբ հայ սպան զոհվում է։ Ես ուզում եմ, որ բոլորը վերադառնան տուն, ու չլինի այն, ինչ կարող է լինել»,-ասաց Գևորգյանը։
«Սասնա ծռեր» զինված խմբի անդամներից մեկը` Արայիկ Խանդոյանը կամ Միայնակ գայլը մասնակցել է Արցախյան ազատամարտին։ Ընտանիքում հինգ տղա կար, բոլորն էլ մի մարդու պես մեկնել են հայոց բանակին ծառայելու։ Խանդոյանը բազմիցս վիրավորվել է պատերազմի ժամանակ, վերջին անգամ վիրավորվելուց հետո սկսել է քայլել հենակով։ 2015 թվականի մարտի 11-ին Արայիկ Խանդոյանը վերադարձրեց Արցախի և ՀՀ-ի «Արիության» մեդալները, «Մարտական ծառայության» պարգևը, «Զորավար Անդրանիկ», «Մարշալ Բաղրամյան» և այլ մեդալները` կապված Բերձորյան դեպքերի հետ, երբ բռնություն էր գործադրվել «Հիմնադիր խորհրդարանի» կազմակերպած տեղեկատվական ավտոերթի մասնակիցների նկատմամբ։
Պավել Մանուկյանը կամ ինչպես շատերին է հայտնի` Ապարանցի Պավլիկը ևս արցախյան ազատամարտիկ է։ Բոլորի մոտ նա ասոցացվում է հայդուկի կերպարով։ Զինակից ընկերները նրան բնութագրում են որպես քաջ ու բարի կերպարի։ 1985-1987 թթ. Մանուկյանը ծառայել է ԽՍՀՄ զինված ուժերում։ Իսկ 1990 թվականին անդամակցել է ՀՅԴ կուսակցությանը։ Հայտնի է, որ Ապարանցի Պավլիկը ԼՂՀ Մարտական Խաչ 2-րդ աստիճանի շքանշանի ասպետ է։
