ԵՐԵՎԱՆ, 20 հուլիսի — Sputnik. Խորենացու փողոցից դեպի Սասունցի Դավթի փողոց տանող երթուղին փոխվել է, հայտնում են Երևանի քաղաքապետարանից։
«Հաշվի առնելով Խորենացի փողոցի Սարի թաղ բարձրացող ճանապարհի սկզբնամասից մինչև Սասունցի Դավիթ փողոցն ընկած միջանկյալ հատվածն անորոշ ժամանակով փակ լինելու հանգամանքը և Սարի թաղն սպասարկող հասարակական տրանսպորտի խաթարված աշխատանքի հետ կապված լուծումներ գտնելու համար Երևանի քաղաքապետ Տարոն Մարգարյանին ուղղված տարածքի բնակիչների դիմումը, Երևանի քաղաքապետի հանձնարարությամբ աշխատակազմի տրանսպորտի վարչության պատասխանատուները հարցը քննարկել են սպասարկումն իրականացնող ընկերության տնօրինության հետ, որի արդյունքում համաձայնություն է ձեռք բերվել տվյալ երթուղին ժամանակավորապես շահագործել այլ ուղեգծով»,- ասված է հաղորդագրության մեջ։
Մասնավորապես` երթուղին կիրականացվի Սարի թաղի հհ. 12, 5, 3, 20, 27 փողոցներ — Դավիթ Բեկի — Ազատամարտիկների — Սասունցի Դավթի փողոցներ — Տիգրան Մեծի պողոտա — «Այրարատ» կ/թ։
Հետադարձը՝ «Այրարատ» կ/թ — Տիգրան Մեծի պողոտա — Մ. Խորենացու —Նար-Դոսի փողոցներ — Տիգրան Մեծի պողոտա — Սասունցի Դավթի — Ազատամարտիկների — Դավիթ Բեկի փողոցներ — Սարի թաղ։
Նման առաջարկով Երևանի քաղաքապետին էր դիմել նաև Մարդու իրավունքների պաշտպանը:
