ԵՐԵՎԱՆ, 20 հուլիսի — Sputnik. Զինված խմբի հետ ՊՊԾ գնդի տարածքում գտնվող Էդգար Սողոմոնյանի հայրը չորեքշաբթի մամուլի միջոցով դիմեց «Սասնա ծռեր» խմբի ղեկավարներին, մասնավորապես` Պավել Մանուկյանին` խնդրելով բաց թողնել իր որդուն:
Նա վստահեցրեց, որ Էդգարը տեսողական խնդիրներ ունի, բանակում չի ծառայել, զենք գործածել չգիտի: «Սասնա ծռեր» խմբի հետ, հոր հավաստմամբ, որդին ոչ մի առնչություն չունի:
Սողոմոնյանը 31 տարեկան է, ծնունդով Սպիտակ քաղաքից, մայրը մահացել է երկրաշարժից, նրան մեծացրել է տատը: Սողոմոնյանն աշխատում է Ռուսաստանում, հայրենիք է եկել մի քանի օր առաջ: Տանն ասել է, որ գնում է հանրահավաքի: Հետագա զարգացումների մասին հարազատները տեղյակ են միայն մամուլից:
«Եթե իմ երեխան չի ուզում դուրս գալ, թող ինքն անձամբ ինձ ասի այդ մասին, նոր ես կհավատամ: Ես ուզում եմ գնալ ու տեսնել իրեն: Ես պետք է իմ երեխայի երեսին ասեմ` դու քաղաքականությունից բան չես հասկանում, ինչու՞ ես գնացել»,- ասաց Սողոմոնյանի հայրը:
Իսկ լրագրողների հարցին, թե փորձե՞լ են արդյոք կապվել Էդգարի հետ, նա չցանկացավ պատասխանել:
Նույն խնդրանքն ուներ նաև Գառնիկ Հովակիմյանի մայրը` Մարինե Պապիկյանը: Նա պատմեց, որ Հովակիմյանը բնակվում է ՌԴ-ում, մեկ ամիս առաջ վերադարձել է Հայաստան` անձնագիրը փոխելու նպատակով` ընտանիքը թողնելով ՌԴ-ում: Հուլիսի 16-ի երեկոյան ժամը 20-ին Հովակիմյանը տնից դուրս է եկել`ասելով, որ գնում է հանրահավաքի, ու այլևս չի վերադարձել:
«Հուլիսի 17-ի առավոտյան ժամը 7-ին զանգեցի իրեն, ձայնն արձագանքում էր, ասացի` Գարիկ, որտե՞ղ ես, ասաց` մի հատ շենքի մեջ եմ, ասացի` ի՞նչ շենք է, ասաց` չգիտեմ»,- պատմեց մայրը` հավելելով, որ որդու հետ զրույցից հասկացել է, որ նա ուզում է դուրս գալ շենքից: «Վախեցած էր»,- ասաց մայրը:
Ի դեպ, երկու երիտասարդների ծնողները նշեցին, որ իրենց որդիներն իրար չեն ճանաչել ու որևէ կապ չեն ունեցել: Սակայն Սողոմոնյանի հայրն ասուլիսի ընթացքում նշեց, որ ՊՊԾ գնդի տարածքում Սպիտակից էլի երիտասարդներ կան, որոնց ինքը ճանաչում է: Բայց նրանց անունները հրաժարվեց հրապարակել:
ՀՀ Ոստիկանության հասարակայնության հետ կապերի և լրատվության վարչության պետ Աշոտ Ահարոնյանի խոսքով՝ մյուսների ծնողները հրաժարվել են մասնակցել ասուլիսին, ուստի նրանց մասին այլ տեղեկություններ չեն հրապարակում:
Հարցին, թե ինչպես են ծնողները հասկացել, որ իրենց որդիները հենց ՊՊԾ շենքում են, ծնողները հստակ պատասխան չտվեցին, բայց պնդեցին, որ համոզված են դրանում: Նրանց փոխարեն պարզաբանումներ ներկայացրեց Ահարոնյանը:
«Մարդիկ ուզում էին դիմել իրենց որդիներին լրատվամիջոցների միջոցով: Մենք ուղղակի տրամադրել ենք հարթակը»,- ասաց Ահարոնյանը:
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
