ԵՐԵՎԱՆ, 19 հուլիսի-Sputnik. Լաուրա Սարգսյան. Ժողովրդի լարված հոգեբանական վիճակը, որը նկատվում է վերջին շրջանում, տարերային երևույթ չէ, այլ նախապատմություն ունի, Sputnik Արմենիա ռադիոյի եթերում ասաց հոգեբան Ռուբեն Աղուզումցյանը։
«Այն, ինչի ականատես ենք լինում, տարերային բնույթ չի կրում։ Դա երկար տարիների ընթացքում կուտակված պատմության բացասական էջերի դրսևորումն է. 1988թ.-ի երկրաշարժ, ԽՍՀՄ փլուզում, ղարաբաղյան հակամարտություն, դրան հավելած` սոցիալ-տնտեսական խնդիրներ»,- ասաց Աղուզումցյանը։
Նրա խոսքով` մարդկանց մեծամասնությունը լարված դրության պատճառով պատրաստ չէ տարաբնույթ փոփոխությունների՝ ինչպես ֆիզիկապես, այնպես էլ հոգեբանորեն ու սոցիալապես։ Դժվար է դիմակայել արտաքին մարտահրավերներին և դրանց արժանի պատասխան տալ։
«Շատ կարևոր է, որպեսզի տեղեկատվության աղբյուրները կարողանան ճիշտ բացատրել իրավիճակը»,- ասաց Աղուզումցյանը։
Ըստ նրա, հենց տեղեկատվության պակասն է մարդկանց դրդում ոչ ադեկվատ արարքների։ Տարաբնույթ երևույթներին բացատրելու համար մարդը գործի է դնում երևակայությունը, որոշակի իրականություն կառուցում, որին ոչ միայն ինքն է սկսում հավատալ, այլ նաև համոզում է ուրիշներին։
«Երեկ ակցիայի ժամանակ մարդիկ եկել էին իրենց հուզող հարցերի պատասխանները ստանալու համար։ Նշված գործոնները հանգեցրել են նրան, որ մենք լարված նյարդային համակարգ ունենք, ինչը հանգեցնում է ագրեսիայի, մեկուսացման, անձի երկատման», — նշեց Աղուզումցյանը։
Աղուզումցյանը կարծում է, որ ցույցերի ժամանակ միշտ սադրանքներ են լինում, դրանցից խուսափելու համար խորհուրդ է տալիս ստեղծված իրավիճակը հնարավորինս զգոն և սառնարյուն գնահատել։
