ԵՐԵՎԱՆ, 19 հուլիսի-Sputnik. Անարդարությամբ արդարություն հաստատել հնարավոր չէ. կարծում է ԱԺ ԲՀԿ խմբակցության ղեկավար Նաիրա Զոհրաբյանը։ Պատմության փորձը ցույց է տալիս, որ արյունով ժողովրդավարություն չեն հաստատում։ Այդ պատճառով էլ պատգամավորը հանդուրժողականության ու բանակցությունների գնալու կոչ է անում։ Մինչդեռ ոմանք հրահրում են իրավիճակի լարում։
«Զգոնության ու սթափության կոչը, չգիտես ինչու, որոշ մարդկանց նյարդայնացնում է, բայց այլ տարբերակ չկա ։ Քաղաքացիական պատերազմ հրահրելու բարոյական իրավունք որևէ մեկս չունենք»,-ասաց նա։
Նաիրա Զոհրաբյանը հույս ունի, որ ոստիկանությունը ուժ չի կիրառի, իսկ զինված խմբին մեկ անգամ ևս հիշեցնում է, որ նրանց արարքը միայն իշխանությանը չի ուղղվում։
«Այստեղ խնդիր է առաջանում` ոչ թե իշխանությանն ես հարվածում, այլ պետությանը։ Մենք իրավունք չունենք մեր հայրենակիցներին վտանգի ենթարկելու գնով փորձել ինչ-ինչ խնդիրներ լուծել։ Ես հասկանում եմ հուսահատված մարդուն, բայց դա փակուղի տանող ճանապարհ է։ Քաղաքական հարթության մեջ բռնությունը պետք է տեղ չունենա»,-ասաց նա։
Զոհրաբյանը հույս հայտնեց, որ Ժիրայր Սեֆիլյանը խոհեմություն կդրսևորի և իր ընկերներին կհորդորի արնահեղության չդիմել։
