ԵՐԵՎԱՆ, 19 հուլիսի-Sputnik. ՀՀ ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանն իր ֆեյսբուքյան էջում անդրադարձել է ակտիվիստ Դանիել Իոաննիսյանի հաղորդագրությանը, որ ոստիկանության բաժիններ բերման ենթարկվածներին նվաստացրել են ոստիկանները։
Աշոտ Ահարոնյանն իր ֆեյսբուքյան գրառման մեջ նշել է, որ ոստիկանություն բերման ենթարկվածներին նվաստացնելու վերաբերյալ ոչ մի փաստ չկա։
«Եվ այս ամենը՝ առանց որևէ կոնկրետ փաստ, տվյալ, հասցե նշելու, անորոշ ակնարկներով, ինչ-որ տեսանյութերով, որոնց տեքստը չի լսվում նույնիսկ ամենամեծ ցանկության դեպքում: Դա զարմանալի է հատկապես այն առումով, որ հիշյալները նախկինում միշտ հականե-հանվանե են անդրադարձել իրենց պաշտպանյալներին: Այսօր այդպես չէ, և դա հիմք է տալիս ենթադրելու, որ իրողությունները շահարկվում են»,-գրել է Ահարոնյանը։
Նա առաջարկել է զերծ մնալ փակուղային ու սիրողական գործելակերպից։ Այնուհետև կոչ է արել աջակցել քննությանը՝ իրականությունը պարզելու և մեղավորությունը ճանաչելու նպատակով։
«Սա է իրողությունների ճշմարիտ պատկերը ստանալու ճանապարհը, իսկ հակառակ դեպքում, կրկնում եմ, ստիպված կլինենք կարծել, որ այս ամենը պրիմիտիվ ու ինֆանտիլ փորձեր են՝ ոստիկանությունը թիրախավորված անվանարկելու և հանրությանը թյուրիմացության մեջ գցելու նպատակով»,-գրել է ՀՀ ոստիկանության հասարակայնության հետ կապերի եւ լրատվության վարչության պետը։
Ի պատասխան Ահարոնյանի գարռմանը` Դանիել Իոաննիսյանն գրել է, որ ինքն ունի 5 ականատեսի վկայություն, որ իրեն նվաստացրել են, բժշկի եզրակացություն և ահազանգը փաստող տեսանյութեր։
