ԵՐԵՎԱՆ, 19 հուլիսի — Sputnik. Զինված խմբի կողմից ոստիկանության շենքը գրավելուց հետո ներկա լռությունը խոսում է դրական շարժի մասին, կարծում է Հայաստանի մարդու իրավունքների առաջին պաշտպան Լարիսա Ալավերդյանը։
«Սա քար լռություն չէ, այս լռությունը խոսում է դրական շարժի մասին, և մենք պետք է հուսանք, որ նման իրավիճակներում, երբ ուրիշները չեն կարողանում գտնել իմաստուն, ոչ թե ճիշտ, այլ իմաստուն լուծում, մենք կարող ենք գտնել»,- ասաց Ալավերդյանը։
Նա դրական է համարում այն փաստը, որ զինյալ խումբը բանակցում է, նրա կարծիքով` այդ քայլերը համաձայնության գնալու քայլեր են, ոչ թե դաժան վերաբերմունքի, «մարդասիրական նորմը հոգեհարազատ է այդ մարդկանց»։
«Բանակցությունների արդյունք է, որ պատանդներին բաց են թողնում, նշանակում է, որ մտադրություն կա ոչ թե ծանրացնել արդեն արածը, այլ հակառակը` գնալ որևէ համաձայնության, քանի որ այդ մարդիկ անցել են պատերազմի թոհ ու բոհով»,- նշեց նա։
Ալավերդյանն ընդգծեց, որ մերժում է զինված հարձակման մեթոդը, այդ բոլորը «օտար է, խորթ է մեզ», դա չի բերել և չի բերելու դրական որևէ արդյունք։ Այն, ինչին զինված խումբը ցանկանում է հասնել, սպրինտով չեն հասնում։
«Դա մարաթոն է, և այստեղ երկար շունչ է պետք, երկար համբերություն և անսահման սեր, որը տեղ չի թողնում ատելության համար։ Պետք է սիրես քո ժողովրդին, հարգես քո անցյալը և չանես այն, ինչ չի տանում քեզ դեպի քո խնդիրների լուծում»,- ասաց Ալավերդյանը։
Նա մեծ ցավ է ապրում, որ ոստիկան է զոհվել, ու նշեց` զինված խմբի անդամները պետք է հիշեն` եթե ևս մեկ կաթիլ արյուն թափվի, ժողովրդի մեջ նրանք արդարացում չեն ունենալու։
Ալավերդյանը համոզված է, որ կա սթափ ելքը։ Միաժամանակ իշխանությանը կոչ արեց` չդիմել ուժի, այլ օգտագործել բոլոր միջոցները բանակցելու ընթացքում։
«Միջազգային նորմերը և մարդու իրավունքներն ասում են` պետք է սպառել բոլոր հնարավորությունները, չլինի այնպես, որ ունենալով ևս մեկ րոպե և վերջին միջոցը, չես օգտագործել և դիմել ես ուժի։ Ուժի կիրառումը միշտ կա ու կա, բայց դա չի նշանակում ուժ, դա նշանակում է անօգնականություն»,-նշեց նա։
Ալավերդյանը հայտնեց, որ մի խումբ քաղաքացիներ, մտավորականներ առաջարկել են իշխանություններին` իրենց ուժերի ներածին չափով օգնել առանց բռնության և անարյուն հանգուցալուծման հասնելուն, «մեզ ուշադիր լսել են և ասել, որ եթե տեսնեն այդ տարբերակը ընդունելի է, մեզ կզանգեն, մինչ այս պահը մեզ չեն զանգել»։
Նա նշեց, որ պատասխանատվություն կրողները երկու կողմն է` և՛ ներսում, և՛ դրսում գտնվող։
