ԵՐԵՎԱՆ, 19 հուլիսի — Sputnik. Կոմպոզիտոր Միքայել Թարիվերդիևի ծննդյան 85-ամյակին նվիրված «Հիշի՛ր այս պահը» միջազգային փառատոնը երեկոյան կմեկնարկի «Թող երկար ձգվի այս պահը, մաեստրո,» օպերային գալա համերգով` Մոսկվայի Մեծ թատրոնի նոր բեմում։
Մեծ թատրոնի գլխավոր տնօրեն Վլադիմիր Ուրինը հուսով է, որ բացումը ներկայացուցչական և շատ հետաքրքիր կլինի։
Փառատոնի նպատակը լուսավորչական է, այդ իսկ պատճառով փառատոնի ժամանակ կհնչի կոմպոզիտորի` շատերին անհայտ երաժշտությունը։
Համերգին կմասնակցեն Մեծ թատրոնի Սիմֆոնիկ նվագախումբը` Ալեքսանդր Պոլյանիչկոյի ղեկավարությամբ և ՄԹ երիտասարդական օպերային ծրագրի մենակատարները։ Նրանք կկատարեն հատվածներ «Ով ես դու», «Կալիոստրո կոմսը», «Ֆիգարոյի ամուսնությունը», «Սպասում» օպերաներից, ինչպես նաև «Եղնիկ արքա» կինոօպերայից։
Փառատոնն անցկացվելու է նաև Ֆրանսիայում, ԱՄՆ-ում, Գերմանիայում, Էստոնիայում, Վրաստանում, Հայաստանում և Մեծ Բրիտանիայում։ Փառատոնի շրջանակում, մասնավորապես, կբացվի կոմպոզիտորին նվիրված երկու ցուցահանդես, մեկը Լոնդոնում, մյուսը` «Առաջին պահից մինչև վերջինը» ցուցահանդեսը, Մոսկվայի Գլինկայի անվան երաժշտական մշակույթի կենտրոնական թանգարանում սեպտեմբերի 2-ին։
Միքայել Թարիվերդիևն ավելի քան 130 ֆիլմերի և հեռուստաֆիլմերի երաժշտության հեղինակն է, ընդգրկվել է Գինեսի ռեկորդների գրքում` որպես կինոյի համար գրված երաժշտության ամենաշատ պարգևների և մրցանակների արժանացած կոմպոզիտոր։ Բացի այդ` Թարիվերդիևը երաժշտություն է ստեղծել մի շարք թատերական ներկայացումների համար, ինչպես նաև գրել է ավելի քան 100 երգ և ռոմանս, մի քանի բալետ և օպերա, կամերային վոկալ շարքեր, սիմֆոնիա և այլ ստեղծագործություններ։
