ԵՐԵՎԱՆ, 18 հուլիսի — Sputnik. Ուժեղացվում է հսկողությունը Խորենացի փողոցում։ Մի քանի ավտոբուսներով մահակներով և զրահաբաճկոններով ոստիկաններ են բերվել Պահակապարեկային ծառայության գնդի հարակից տարածք։ Նրանք մի քանի շղթա կազմեցին, նրանց մի մասը շարժվեց գնդի շենքի ուղղությամբ։
Որոշ ժամանակ առաջ գնդի շենքի մոտ լսվել են կրակոցի նման ձայներ։
Sputnik Արմենիայի թղթակիցը կապվեց «Հիմնադիր խորհրդարան» ընդդիմադիր քաղաքացիական նախաձեռնության համակարգող Ժիրայր Սեֆիլյանի տեղակալ Վարուժան Ավետիսյանի հետ, ով պարզաբանեց, որ դրանք հրավառության ձայներ են եղել: Նույնը տեղի է ունեցել նախօրեին երեկոյան, ինչը խուճապ է առաջացրել հարակից տների բնակիչների շրջանում:
Ավետիսյանը նշեց, որ որոշ ժամանակ առաջ շրջափակված շենքի մոտ տեղի է ունեցել ոստիկանական տեխնիկայի տեղաշարժ, սակայն ներկա պահին ամեն ինչ դադարել է: Նա հավելեց, որ իրավիճակը տվյալ պահին համեմատաբար հանգիստ է:
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
