ԵՐԵՎԱՆ, 18 հուլիսի — Sputnik. Ազատության հրապարակում երկուշաբթի երեկոյան հանրային քննարկման հավաքվածները որոշում կայացրեցին խաղաղ երթ անցկացնել՝ քաղբանտարկյալներին ազատ արձակելու պահանջով:
Երթը կանցնի Հյուսիսային պողոտա-Հանրապետության հրապարակ- Ամիրյան փողոց- Մաշտոցի պողոտա երթուղով: Ինչպես հայտարարեց ակտիվիստ Մաքսիմ Սարգսյանը, երթի ավարտին նախատեսվում է դարձյալ վերադառնալ Ազատության հրապարակ:
ՀՀ փոխոստիկանապետ Հունան Պողոսյանը, ով այդ պահին գտնվում էր հրապարակում, հանրային հավաքի մասնակիցներին հավաստիացրեց, որ ոստիկանությունը երթին չի խոչընդոտի:
Ցուցարարներն իրենց հերթին խոստացան, որ երթը բացառապես խաղաղ բնույթ կկրի:
«Մենք խաղաղ ենք, և պահանջում ենք, որ այդ տղաների նկատմամբ չկիրառեն նոր բռնություն, չտանեն արյունահեղության»,- երթի ընթացքում հայտարարեց Մաքսիմ Սարգսյանը:
Երթի մասնակիցներին ուղեկցում են ոստիկանները, ակտիվիստները վանկարկում են «Ազատ, անկախ Հայաստան»։
Նշենք, որ քննարկումը և երթը անցկացվում են` կապված նախօրեին զինված խմբի կողմից ոստիկանության ՊՊԾ գնդի գրավման հետ։ Կիրակի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
Զինված խմբի անդամների հետ ընթանում են բանակցություններ, որի արդյունքում մի քանի ոստիկան ազատ է արձակվել, այժմ նրանց մոտ 4 ոստիկան կա։
