ԵՐԵՎԱՆ, 18 հուլիսի — Sputnik. Ոստիկանությունը մեծացրել է Ոստիկանության պարեկապահակային ծառայության գնդի հարակից տարածքի հսկվող հատվածը, հայտնում է Sputnik Արմենիայի թղթակիցը դեպքի վայրից։
Ոստիկանները ժապավենով արգելափակված տարածքից մոտ տաս մետր առաջ են անցել` կազմելով կենդանի պատ։
Ինչպես մեկնաբանել է ոստիկանության սպան, տարածքը մեծացվել է լրագրողների անվտանգությունն ապահովելու համար, քանի որ ներսում գործողություն է տեղի ունենում, և դա արվել է` ծառայողական անհրաժեշտությունից դրդված։
Լրագրողներին թույլ չեն տալիս անցնել արգելափակված տարածքից ներս, սակայն մյուսներին`անցորդներին կամ տեղի բնակիչներին թույլ են տալիս։ Հարցին, թե պետք չէ՞ պահպանել նաև բնակիչների անվտանգությունը, ոստիկանները չեն պատասխանում։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
