ԵՐԵՎԱՆ, 17 հուլիսի — Sputnik. «Հիմնադիր խորհրդարանը», որի անդամները գրավել են ՀՀ ոստիկանության պարեկապահակային ծառայության գնդի շենքը, պահանջում են ազատ արձակել Ժիրայր Սեֆիլյանին, ինչպես նաև Սերժ Սարգսյանի հրաժարականի պահանջ են ներկայացնում, հաղորդում է Ազատություն ռադիոկայանը:
«Հիմնադիր խորհրդարանի» մամուլի քարտուղար Վարուժան Ավետիսյանը փոխանցել է, որ Ոստիկանության Էրեբունու բաժնում մնալու են այնքան, մինչև իրենց պահանջները կատարվեն:
Ավետիսյանի խոսքով, երկու կողմերից էլ կան վիրավորներ, իսկ գերի ունենալու մասին տեղեկությունները ճիշտ չեն: Ավետիսյանի փոխանցմամբ` բաժնում գտնվող ոստիկանները գերի չեն, պարզապես իրենց մոտ են գտնվում:
Այսօր ավելի վաղ Վարուժան Ավետիսյանը Ֆեյսբուքի իր էջում գրել էր, որ իրենք ապստամբություն են սկսել և ոստիկանական շենք գրավել: Նա նաև նշել էր.
«Ոստիկանությունն իրականությանը չհամապատասխանող լուրեր է տարածում, իբրև թե ապստամբներն են կրակել և վիրավորել մի ոստիկանի, որը, ըստ ոստիկանության լուրերի, մահացել է: Իրականում, անտեսելով մեր բազմաթիվ հորդորները, ոստիկանությունը գրոհ կազմակերպեց մեր վրա զրահամեքենայով և կրակ բացեց ապստամբների ուղղությամբ: Ապստամբները ստիպված ինքնապաշտպանության նպատակով պատասխան կրակ բացեցին»:Էրեբունու բաժանմունք տանող ճանապարհը ոստիկանները մեծ բեռնատարներով փակել են։
Ազգային անվտանգության աշխատակիցները փորձում է բանակցություններ վարել ոստիկանության շենքը գրավողների հետ։ Դեպքի վայրում են ՀՀ ոստիկանության և ԱԱԾ բարձրաստիճան պաշտոնյաները։ Ոստիկանության գնդի մոտ են նաև շտապօգնության մեքենաները։
