ԵՐԵՎԱՆ, 16 հուլիսի- Sputnik. Ստամբուլում բնակվող Նժդեհ Շահնազարյանը Sputnik Արմենիա ռադիոյի եթերում պատմեց այն իրավիճակի մասին, որը հիմա տիրում է քաղաքում: Ստամբուլում պետական հեղաշրջման փորձի պատճառով չեղյալ են հայտարարվել բոլոր ավիաչվերթները, մասամբ աշխատում է հասարակական տրանսպորտը, մետրոն փակ է: Պարբերաբար լսվում են կրակոցներ:
«Մեծ թվով զոհեր կան, բոլոր ճանապարհները փակ են, քաղաքում կրակոցներ են հնչում, աշխատում են միայն մինիբասները և ավտոբուսները, որոշ խանութներ նույնպես փակ են»,- ասաց Շահնազարյանը:
Նա խոստովանեց, որ երեկ գիշեր sms-հաղորդագրություն է ստացել ցույցի դուրս գալու և կառավարական ռեժիմին աջակցելու կոչով, սակայն որոշել է դուրս չգալ փողոց:
Հուլիսի 15-ի ուշ երեկոյան Թուրքիայում կատարվել է ռազմական հեղաշրջման փորձ: Անկարայում խորհրդարանի շենքի և նախագահական նստավայրի վրա նետել են ռումբեր, դատախազության տվյալներով՝ Անկարայում և Ստամբուլում մահացել է առնվազն 60 մարդ:
