ԵՐԵՎԱՆ, 16 հուլիսի-Sputnik. «Ակոս» թերթի հայկական բաժնի խմբագիր Բագրատ Էստուկյանը եղելությունը անվանեց «անհաջող հեղափոխության փորձ»: Նրա խոսքով, երկրում հասարակությունը բաժանված է երկու մասի՝ Էրդողանին պաշտողներ ու նրան ատողներ: Հենց վերջիններս կազմակերպեցին իշխանության հեղաշրջման փորձը:
«Փորձեցին այդ միջոցով չեզոքացնել Էրդողանին, բայց Կառավարությունն արդեն հսկողության տակ է առել իրավիճակը: Շուրջ 200 մարդ մահացավ, 1150-ն էլ վիրավորվեց: Մոտ 700 հոգի ձերբակալվեց, նրանց մեծ մասը զինվորականներ են»,-ասաց Էստուկյանը:
Էստուկյանը տեղեկացրեց նաև, որ ապստամբները հիմնականում շարքային զինվորականներն էին, չնայած, նրանց մեջ կային նաև հրամանատարներ, գեներալ-մայորներ:
«Ակնհայտ է, որ սա Թուրքիայի ամբողջ բանակի նախաձեռնությունը չէր»,-ավելացրեց նա:
Նրա նախնական տեղեկատվությամբ այսօր երեկոյան մարդիկ պատրաստվում են ցույցի դուրս գալ: Այս պահին իրավիճակը լարված է միայն Անկարայում:
