ԵՐԵՎԱՆ, 15 հուլիսի-Sputnik. «Ոսկե ծիրան» կինոփառատոնը 6-րդ օրը մթագնեց Ֆրանսիայի Նիս քաղաքում տեղի ունեցած հրեշավոր ահաբեկչությամբ, առավել ևս, որ այսօր նախատեսված էր ֆրանսիական կինոյի ցուցադրություն։
Մութ ու ցուրտ 90-ականների թեմային անդրադարձը չսահմանափակվեց միայն Դավիթ Սաֆարյանի «Տեղական ժամանակը` 28։94» ֆիլմի ցուցադրությամբ։
Երիտասարդ և խոստումնալից Աննա Արևշատյանը հանդիսատեսին ներկայացրեց «Բարի լույս» ֆիլմը, որը շատերի վրա մեծ տպավորություն գործեց։
Ցուցադրությունից առաջ «Մոսկվա» կինոթատրոնի Կարմիր սրահի մոտ տեղադրվել էին աղուհացով սեղաններ։ Բոլոր ցանկացողները կարող էին համտեսել մատնաքաշ հաց, որը խորհրդանշում է ամենագլխավորը մութ ու ցուրտ տարիներին։
13-րդ «Ոսկե ծիրանի» վարպետության դասերի շարքն ավարտեց ռուս լրագրող, վավերագիր ռեժիսոր, «Մասնագիտությունը` թղթակից» շարքից հայտնի հեռուստահաղորդումների հեղինակ Անդրեյ Լոշակը։ Հատուկ հետաքրքրություն առաջացրեց այն փաստը, որ հենց Լոշակն է նկարել «Ավրորա» շարքի ֆիլմերը։
Ֆրանսիական նոր ֆիլմի ծրագիրը սկսվեց մեկ րոպե լռությամբ` ի նշան Ֆրանսիայի Նիս քաղաքում տեղի ունեցած ահաբեկչական գործողության զոհերի հիշատակի։ Դրանից հետո սկսվեց ֆրանսիացի ռեժիսոր Պիեր Լեոնի «Երկու Ռեմի, երկու» («Deux Rémi, deux», ֆրանսերեն բառախաղ` դո-ռե-մի-դո)։ Ֆիլմը Ֆյոդոր Դոստոևսկու «Նմանակը» պատվածքի ազատ էկրանավորումն է։ Պիեր Լեոնն անձամբ ներկա էր ցուցադրությանը և վերջում հաճույքով պատասխանեց հանդիսատեսի հարցերին։
Իրանական կինոն ներկայացվեց ռեժիսոր Մաջիդ Բարզեգարի «Ամենասովորական քաղաքացի» ֆիլմի ցուցադրությամբ, իսկ թուրքական կինոն` համշենահայ Օզջան Ալբերի «Քամու հիշողությունը» ֆիլմով։
