ԵՐԵՎԱՆ, 15 հուլիսի-Sputnik.Դավիթ Գալստյան. Հայաստանում 102-րդ ռուսական ռազմակայանի զինծառայողները «Ալագյազ» զորավարժարանում տեղի ունեցած մարտավարական զորավարժությունների ընթացքում հետ մղեցին պայմանական հակառակորդի մոտոհրաձգային դիվիզիան, որից հետո անցան հակահարձակման։
«Ալագյազ» բարձր լեռնային զորավարժարանում 100 կմ երթից հետո Հարավային ռազմական օկրուգի ռուսական ռազմակայանի ստորաբաժանումները ձեռնամուխ եղան մարտավարական զորավարժությունների հիմնական փուլի մշակմանը և անցան բարձր լեռնային պայմաններում պաշտպանությանը։
ՀՌՕ շտաբի մարտական պատրաստության վարչության պետ Ռոման Բինյուկովը նշեց, որ 102-րդ ռազմակայանի առջև դրված առաջադրանքը կատարվել է։
«Մենք կվերլուծենք թույլ տրված սխալները։ Լավ են աշխատել տանկիստները և հրետանին, առաջխաղացում կա հակատանկային ստորաբաժանումներում»,- ասաց Բինյուկովը։
Նրա խոսքով` զորավարժություններն ավարտված չեն, առջևում երթեր կան և մարտական կարողությունների վերականգնում։ Ավարտվել է մարտական հրաձգության փուլերից միայն մեկը։
Բինյուկովը նշեց, որ ռազմակայանի զինծառայողները պատրաստ են կատարել առաջադրանքները, այդ թվում` հարձակումը հետ մղել և լուծել բազայի առջև դրված մյուս մարտավարական խնդիրները։
Նրա խոսքով` Անդրկովկասում ռուսական միավորման մարտական պատրաստվածության մակարդակն ընթացիկ տարում աճել է 1,5 անգամ, մարտական պատրաստվածությանն ուղղված միջոցառումների անցկացման արդյունքում։
Նա նաև նշեց, որ համագործակցում են հայկական ԶՈՒ հետ, և ռազմակայանի առջև դրված բոլոր խնդիրները գտնվում են կոլեկտիվ անվտանգության ընդհանուր դաշտում։
Զորավարժությունների պայմաններով` «Տախիոն», «Օռլան-10» և «Նավոդչիկ-2» անօդաչու թռչող սարքերի օգնությամբ հայտնաբերվել են պայմանական հակառակորդի առաջ շարժվող խմբերը և գրանցվել նրա կոորդինատները։
Հրետանավորները դիպուկ հարված են հասցրել «Գիցիանտ», «Գվոզդիկա» զինատեսակներից և «Գրադ» կայանքից։ Նահանջող հակառակորդին գրոհել են տանկերի, հետևազորի մարտական մեքենաներից, «Կոնկուրս» հակահրթիռային համալիրներից, Մի-24Պ և Մի-8ՄՊ հարվածային և գրոհիչ ուղղաթիռների աջակցությամբ։
Ուսումնական միջոցառումներին մասնակցել են ավելի քան 2,5 հազար զինծառայողներ, շուրջ 500 միավոր ռազմական տեխնիկա, հակաօդային պաշտպանության, կործանիչ և բանակային ավիացիայի ուժեր։
