ԵՐԵՎԱՆ, 15 հուլիսի-Sputnik. Ֆրանսիական Lefigaro պարբերականը, հղում անելով 20minutes կայքին, գրել է, որ Նիսում տեղի ունեցած ահաբեկչության ընթացքում կորել է 8 ամսական մի երեխա, որին գտել են Ֆեյսբուք սոցիալական ցանցի միջոցով։
Նիսում ահաբեկչությունից րոպեներ անց ֆեյսբուքում հայտնվել է հետևյալ հեշթեգը` #PortesOuvertesNice։ Ընտանիքն այս հեշթեգի միջոցով կարողացել է գտնել իր 8 ամսական երեխային։
Երեխան, որին ծնողները ահաբեկչության ժամանակ կորցրել էին, ճիչեր է արձակել, ինչին արձագանքել են անծանոթները։
Ընտանիքի մտերիմներից մեկը գրել էր հետևյալ բովանդակությամբ հաղորդագրություն. «Մենք փնտրում ենք 8 ամսական երեխայի, եթե նրան տեսնեք, եթե այդտեղ եք, կապ հաստատեք մեզ հետ»։ Նա նաև տեղադրել էր երեխայի լուսանկարը։
Երեխան վերջապես գտնվել է։ Անծանոթները կարողացել են կապ հաստատել փոքրիկի ծնողների հետ։
Նույն մարդը հայտնել էր նաև լավ լուրը. «Գտնվել է. անսահման շնորհակալ ենք օրիորդ Ջոյ Ռյուեին»։
Հինգշաբթի երեկոյան մարդիկ հավաքվել էին Նիսի Անգլիական ափին` դիտելու Բաստիլի գրավման օրվան նվիրված հրավառությունը։ Ականատեսների տվյալներով` բեռնատարը մտել է ամբոխի մեջ, վարորդը զիգզագաձև վարելով` անցել է 2 կմ` վրաերթի ենթարկելով մարդկանց, ինչպես նաև կրակ է բացել նրանց ուղղությամբ։ Զոհվել է 80 մարդ, վիրավորվել` 18-ը։ Բեռնատարը ոչնչացվել է ոստիկանության կողմից։ Ֆրանսիայի նախագահը սա ահաբեկչություն է որակել։
