ԵՐԵՎԱՆ, 15 հուլիսի — Sputnik. Նիսում ահաբեկչության հետևանքով զոհվել է ՀՀ քաղաքացի, հայտնում են ՀՀ արտաքին գործերի նախարարությունից։
Ըստ հաղորդագրության` մանրամասները ճշտվում են։
«Մարսելում ՀՀ գլխավոր հյուպատոսությունը կապի մեջ է զոհվածի հարազատների հետ՝ անհրաժեշտ օժանդակություն ցուցաբերելու համար»,- ասված է ԱԳՆ ֆեյսբուքի պաշտոնական էջում։
Նիսի հայկական համայնքից Sputnik Արմենիային հայտնել էին, որ զոհվածը երիտասարդ կին է։
Հայաստանի ԱԳՆ-ն դատապարտել է Նիսի ահաբեկչությունը և ցավակցել զոհերի հարազատներին։
Նիսի ողբերգության մասին վերլուծություն կարելի է ընթերցել այստեղ >>
Հինգշաբթի երեկոյան մարդիկ հավաքվել էին Նիսի Անգլիական ափին` դիտելու Բաստիլի գրավման օրվան նվիրված հրավառությունը։ Ականատեսների տվյալներով` բեռնատարը մտել է ամբոխի մեջ, վարորդը զիգզագաձև վարելով` անցել է 2 կմ` վրաերթի ենթարկելով մարդկանց, ինչպես նաև կրակ է բացել նրանց ուղղությամբ։ Զոհվել է 80 մարդ, վիրավորվել` 18-ը։ Բեռնատարը ոչնչացվել է ոստիկանության կողմից։ Ֆրանսիայի նախագահը սա ահաբեկչություն է որակել։
