ԵՐԵՎԱՆ, 15 հուլիսի — Sputnik. ԱՄՆ սենատը միաձայն հաստատել է դիվանագետ Մարի Յովանովիչին Ուկրաինայում դեսպանի պաշտոնում, հայտնում են ուկրաինական ԶԼՄ-ները` հղում անելով Կոնգրեսի վերին պալատի աշխատակազմին։
Յովանովիչը տարբեր տարիների գլխավորել է դիվանագիտական ներկայացուցչություններ Հայաստանում և Ղրղըզստանում, ինչպես նաև եղել է Ուկրաինայում ԱՄՆ ժամանակավոր հավատարմատար։
Նա աշխատել է նաև ԱՄՆ-ի դիվանագիտական ներկայացուցչություններում Մոգադիշոյում (Սոմալի), Լոնդոնում, Մոսկվայում և Օտտավայում։ 2001 թվականի օգոստոսից մինչև 2004 թվականի հունիսը Յովանովիչը զբաղեցնում էր Ուկրաինայում ԱՄՆ ժամանակավոր հավատարմատարի և Ամերիկայի դեսպանի տեղակալի պաշտոնը։
Յովանովիչը եղել է ԱՄՆ պետքարտուղարի քաղաքական հարցերով տեղակալի ավագ խորհրդականը, որից հետո 2005 թվականին Ղրղըզստում ստանձնել է դեսպանի պաշտոնը։ 2008 թվականին նա նշանակվեց Հայաստանում ԱՄՆ դեսպանի պաշտոնում, որտեղ մնաց մինչև 2011 թվականի ամառ։
