ԵՐԵՎԱՆ, 15 հուլիսի — Sputnik. Նիսի ահաբեկչության հեղինակը հայտնի էր ոստիկանությանը, բայց ոչ հետախուզական ծառայությանը, հայտնում է ֆրանսիական Lefigaro-ն։
Պարբերականը գրում է, որ ըստ աղբյուրների հաղորդած տեղեկատվության` Նիսի ահաբեկչության հեղինակը 31 տարեկան տղամարդ է, նրա անունն առայժմ չի հրապարակվում։ Հայտնի է, որ նա թունիսյան արմատներ ունի։
Նրա անձը հաստատող փաստաթուղթը հայտնաբերվել է բեռնատարում։
ՀՀ ԱԳՆ-ն դեռևս տեղեկություն չի հրապարակել զոհվածների թվում հայերի առկայության մասին, սակայն ըստ որոշ չճշտված տվյալների` ահաբեկչության զոհերի թվում մեկ հայուհի կա։
Հինգշաբթի երեկոյան մարդիկ հավաքվել էին Նիսի Անգլիական ափին` դիտելու Բաստիլի գրավման օրվան նվիրված հրավառությունը։ Ականատեսների տվյալներով` բեռնատարը մտել է ամբոխի մեջ, վարորդը զիգզագաձև վարելով` անցել է 2 կմ` վրաերթի ենթարկելով մարդկանց, ինչպես նաև կրակ է բացել նրանց ուղղությամբ։ Զոհվել է 80 մարդ, վիրավորվել` 18-ը։ Բեռնատարը ոչնչացվել է ոստիկանության կողմից։ Ֆրանսիայի նախագահը սա ահաբեկչություն է որակել։
