Վեց մասնակից կա նաև Հայաստանից, նրանցից մեկը Տիգրան Այվազյանն է։ Նրա կարծիքով` երկրում կան անհրաժեշտ բոլոր պայմաններն ու մասնագետները, որոնք կարող են սովորեցնել այս մարզաձևը, սակայն ակտիվ պարապլաներիստներ երկրում քիչ կան։
«Մենք չունենք ակտիվ պարապլաներիստներ, շաբաթը մեկ կամ ավելի թռչող մարդիկ քիչ են։ Այս մարզաձևը շատ ուշադրություն և ուժ է պահանջում` 20 տոկոսը հաճույքն է և թռիչքը, 80 տոկոսը` աշխատանքը։ Իմ կյանքը փոխվել է այն օրվանից, ինչ սկսել եմ թռչել, ու հիմա միայն դրա մասին եմ մտածում», — ասաց Այվազյանը։
Մրցումների տնօրեն Սերգեյ Շեպելյովի խոսքով` այս առաջնությունը միջազգային կարգավիճակ ունի, ինչը հնարավորություն է տալիս երկրի իշխանությունների կողմից պատշաճ պայմանների դեպքում հետագայում Աշխարհի գավաթն անցկացնել Հայաստանում։
«Սա մեծ նշանակություն կունենա ինչպես Հայաստանի, այնպես էլ Հայաստանում պարապլաներիզմի զարգացման համար։ Հայաստանը մեծ ներուժ ունի, թռիչքի, վայրէջքների և վերելքների համար շատ հարմար վայրեր կան», — ասում է Շեպելյովը։
Մրցումներն անցկացվում են Թեղենիս լեռան գագաթին` Բուժական գյուղի մոտ։
