ԵՐԵՎԱՆ, 14 հուլիսի — Sputnik. Որևէ տհաճ անակնկալ լինել չի կարող, ճեպազրույցի ժամանակ ասել է Ռուսաստանի ԱԳՆ պաշտոնական ներկայացուցիչ Մարիա Զախարովան` մեկնաբանելով հասարակության մեջ հնարավոր հուզումները, որոնք կարող են առաջանալ ղարաբաղյան խնդրի վերաբերյալ ձեռք բերված պայմանավորվածությունների հրապարակումից հետո։
Ավելի վաղ Զախարովան նշել էր, որ ղարաբաղյան հարցը լռություն է պահանջում։ Այնուամենայնիվ, հասարակությունը մտահոգված է գործընթացների մասին ոչ բավարար իրազեկված լինելուց, որոնք ընթանում են փակ դռների ետևում երկու պետությունների ղեկավարների կամ արտգործնախարարների մասնակցությամբ։
Ժողովուրդն անհանգստացած է հավանական արդյունքների վերաբերյալ անտեղյակությունից, և տհաճ անակնկալների է սպասում։
Սակայն, Զախարովայի խոսքով, ինչպես մեկ, այնպես էլ մյուս կողմի փորձագիտական խմբերը հրաշալի տեղյակ են գործընթացից։
«Ոչ մի անակնկալ ոչ մի, ոչ էլ մյուս կողմի համար չկա և լինել չի կարող», — հայտնել է Զախարովան։
Նրա խոսքով` մաքոքային դիվանագիտությունը, որը վարում է Ռուսաստանը, ենթադրում է հարցերի առաջադրում, պատասխանների որոնում և հավանական հանգուցալուծումներ։
«Դա հսկայական գործընթաց է, որում ներգրավված են փորձագետներ ինչպես մի, այնպես էլ մյուս կողմից», — ասել է Զախարովան։
Ռուսաստանի ԱԳՆ պաշտոնական ներկայացուցիչը հույս է հայտնել, որ բանակցային գործընթացը կառուցողական արդյունքներ կտա և խաղաղություն կբերի բոլոր կողմերին։
«Վախենալ պետք է բանակցային գործընթացի խափանումից», — նախազգուշացրեց Զախարովան։
Դիվանագետը հիշեցրել է, թե որքան երկար էին կողմերը գնում բանակցային գործընթացի վերսկսմանը։
«Այժմ բոլոր թիմերը պետք է խաղան ընդհանուր արդյունքի հասնելու համար, քանի որ արդյունքն իսկապես պետք է ընդհանուր լինի», — ասել է ՌԴ ԱԳՆ պաշտոնական ներկայացուցիչը։
Զախարովան նշել է, որ կարևորն ընդհանուր նպատակն է, այն է` նոր զոհեր չունենալը։
Լեռնային Ղարաբաղի հակամարտության կարգավորման գործընթացում Անկարայի դերի մասին հարցին պատասխանելիս Զախարովան հերթական անգամ նշել է, որ այս կամ այն պետության ցանկացած կառուցողական դեր միայն կարելի է ողջունել։
«Ցանկացած կառուցողական ազդեցություն օգուտ կտա, ցանկացած ոչ կառուցողական ազդեցություն` վնաս», — ասել է Զախարովան։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
