ԵՐԵՎԱՆ, 14 հուլիսի — Sputnik. Ռուսական արտադրության Ford թեթև մարդատար ավտոմեքենաներ կհայտնվեն հայկական շուկայում, գրված է Ford Sollers ամերիկա-ռուսական ընկերության մամուլի հաղորդագրության մեջ։
«Ռուսական արտադրության ավտոմեքենաները կօգնեն Ford-ին ամրապնդել դիրքերը Հայաստանի շուկայում և բարձրացնել բրենդի շուկայի մասնաբաժինը երկրում` շնորհիվ ավտոմեքենաների մրցակցային արժեքի և Ford-ի լայն մոդելային շարքի։ Նոր Ford Fiesta-ն սեդան թափքով, ինչպես նաև նոր Ford Mondeo և Ford EcoSport ավտոմեքենաներն առաջին անգամ կներկայացվեն Հայաստանի շուկայում», — գրված է հաղորդագրության մեջ։
Ford Sollers ընկերությունը (ամերիկյան Ford Motor Company և ռուսական «Սոլերս» համատեղ ձեռնարկություն) կարտահանի ռուսական արտադրության բոլոր Ford մարդատար ավտոմեքենաները. նոր Ford Fiesta-ն սեդան թափքով, Ford Focus, Ford Mondeo, Ford Explorer, Ford Kuga և Ford EcoSport։ Մատակարարումն իրականացվելու է Հայաստանում Ford-ի պաշտոնական ներկրող «Ֆորա» ընկերության կողմից, որը Հայաստանում Ford բրենդը ներկայացնում է 2004 թվականից։
Ավելի վաղ Ford Sollers-ն ավտոմեքենաներ էր արտահանում Ղազախստան և Բելառուս։
Ford Sollers ՀՁ պատասխանատու է Ford ավտոմեքենաների ռուսական արտադրության, ներկրման և ռուսական շուկայում Ford-ի արտադրանքի բոլոր տեսակների (ներառյալ ավտոմեքենաները, պահեստամասերը և աքսեսուարները) վաճառքի համար։
