ԵՐԵՎԱՆ, 14 հուլիսի — Sputnik. «Ոսկե ծիրան» միջազգային փառատոնի հինգերորդ օրը սկսվեց բասկ ռեժիսոր Ասիեր Ալտունայի (Asier Altuna) «Ամամա» ֆիլմի քննարկումով։
Փառատոնին ներկայացված նրա ֆիլմը գլխավոր հերոսներից մեկի` Ամամա տատի անունով է։ Ռեժիսոր ու սցենարիստ Ալտունան նրան յուրահատուկ կերպար է համարում։ Ֆիլմը պատմում է Բասկերի երկրում գյուղական կյանքի մասին, որը կտրուկ փոխվում է ուրբանիզացիայի ճնշման տակ։
«Իմ ձեռքերը տարբերվում են հորս կոշտուկապատ ձեռքերից։ Իմ ֆիլմում ես ցանկացել եմ ցույց տալ հենց ֆերմերների ձեռքերը, որոնք դեռ ինչ-որ տեղ կան», — ասաց Ալտունան։
Ռեժիսորի խոստովանությամբ` ֆիլմում երկու իրողություն կա` իրական և մտացածին։ Ալտունան հանդիսատեսին ցույց է տալիս ֆերմա, որի մասին դեռ մանկուց է երազել։ Ֆիլմը էսթետիկայի և քնարերգության տարրեր է պարունակում, դրա մեջ հստակ երևում է ներկայի և ապագայի հակասությունը, սերունդների բախումը։
«Ֆիլմը քիչ բյուջետային է, սակայն մենք նրա մեջ հոգի ենք ներդրել», — ասաց Ալտունան։
«Ամամա» ֆիլմը մասնակցել է մի շարք փառատոների և մի քանի մրցանակ ստացել։
Ալտունան նշեց նաև, որ իր համար մեծ պատիվ է գտնվել Հայաստանում և մասնակցել «Ոսկե ծիրան» կինոփառատոնին։ Նրան ցնցել է ականավոր հայ ռեժիսոր Սերգեյ Փարաջանովի «Նռան գույնը»։ Այդ ֆիլմը, ռեժիսորի խոսքով, կդառնա իր հաջորդ ֆիլմի նախատիպը։
