ԵՐԵՎԱՆ, 14 հուլիսի — Sputnik, Լաուրա Սարգսյան. Հայտնի դերասանուհի, XX դարի սեքս խորհրդանիշ, 72-ամյա Ժակլին Բիսեթը Sputnik Արմենիայի թղթակցի հետ զրույցում հայտնեց իր երիտասարդության և գեղեցկության բաղադրատոմսը։
«Առաջին հերթին ամեն ինչին անհրաժեշտ է դրական և սիրով վերաբերվել։ Սննդակարգը պետք է պարունակի մեծ քանակությամբ միրգ և բանջարեղեն։ Անպայման այս ամենը պետք է համադրվի մեկ գավաթ կարմիր գինու, սպորտի և լավ ընկերների հետ», — ասաց Բիսեթը։
Հարցին, թե ինչպես է նա իրեն զգում դարաշրջանի ամենագեղեցիկ կնոջ կարգավիճակում, Բիսեթն ասաց, որ իրեն այդպիսին չի համարում և ընդհանրապես նման հարցերը ոչ կոռեկտ է համարում, քանի որ դրանք վիրավորում են մյուս կանանց։
«Մի անգամ, երբ ես երկար նայում էի հայելուն, հայրս ասաց ինձ, որ ես ուրիշներին նայեմ, քանի որ մարդկանց առաջին հերթին հետաքրքրում է, թե ինչ ես դու մտածում իրենց մասին, և միայն հետո են նրանք քեզ նայում» — եզրափակեց դերասանուհին։
1977 թվականին «Newsweek»-ը Ժակլին Բիսեթին անվանեց «բոլոր ժամանակների ամենագեղեցիկ կինոդերասանուհի»։
