ԵՐԵՎԱՆ, 14 հուլիսի-Sputnik. Հայաստանը ծրագրում է սկսել ռազմական նշանակության գիշերային տեսանելիության և ջերմատեսիլ սարքերի արտադրություն։ Այս մասին հայտնեց ՀՀ էկոնոմիկայի նախարար Արծվիկ Մինասյանը։
Էլեկտրոնիկայի և ճշգրիտ ճարտարագիտության ոլորտում գործունեություն ծավալելու համար կառավարությունը «Ունիկում ինժիներինգ» ընկերությանը տվեց «ՌԱՕ Մարս» ՓԲԸ տարածքում շահագործողի իրավունք։
«Գիշերային տեսանելիության և ջերմատեսիլ սարքերի արտադրությունն ու արտահանումը նախատեսվում է կազմակերպել ազատ տնտեսական գոտում։ Ըստ նախատեսվածի` ծրագրի երկրորդ տարում` 2017 թվականին, արտահանման ծավալները կկազմեն մոտ 5 միլիոն դոլար, 5-րդ տարում` շուրջ 12 միլիոն դոլար։ Ծրագրի առաջին տարվա ընթացքում նախատեսվում է արտադրել ու արտահանել 1000 սարք` հետագայում քանակը հասցնելով մինչև 5500-ի։ Արտահանման հիմնական ուղղությունը Ռուսաստանն է»,-ասել է Ա. Մինասյանը։
Նա հայտնել է, որ ներդրումները կազմում են մոտ 31 միլիոն դոլար։ Ծրագրի իրականացման դեպքում կստեղծվի 10 նոր աշխատատեղ` 150 հազար դրամ միջին աշխատավարձով։ Ծրագրի 5-րդ տարում աշխատողների թիվը կավելանա 35-ով` 350 հազար միջին աշխատավարձով։ Ռազմական նշանակության գիշերային տեսանելիության սարքերը ՀՀ-ից կարտահանվեն ԵԱՏՄ։
