ԵՐԵՎԱՆ, 13 հուլիսի- Sputnik. Վիզաները չեղարկելու մասին հուշագիրը տրամաբանական բարձրակետն էր հայ-իրանական քաղաքական հարաբերությունների մակարդակի, նշեց իրանագետ, ԵՊՀ արևելագիտության ֆակուլտետի իրանագիտության ամբիոնի վարիչ Վարդան Ոսկանյանը։
«Այսինքն` երկու երկրները հասել են քաղաքական հարաբերությունների այնպիսի վստահելի մակարդակի, որ վիզային ռեժիմի առկայությունն արդեն որոշակի խոչընդոտներ էր առաջացնում այդ հարաբերությունների հետագա զարգացման տեսանկյունից»-նշեց նա։
Նրա խոսքով` առաջին հերթին կարևոր է այդ քայլի քաղաքական նշանակությունը, պակաս կարևոր չէ նաև տնտեսական հեռանկարը, քանի որ Հայաստանի համար բացվում է իրանական հսկայական շուկան։ Մի շարք ոլորտներում ևս վիզային ռեժիմը հանելը դրական ազդեցություն կթողնի։
«Դա նախ զբոսաշրջության ոլորտն է, ազատ տեղաշարժի հնարավորությունը, երկու ժողովուրդների և երկրների միջև մշակութային փոխայցելությունները։ Հատկապես Սյունիքի մարզում, որն Իրանի անմիջական հարևանն է, այս տեսանկյունից լուրջ հեռանկարներ են բացվում»,- մեկնաբանեց իրանագետը։
Ոսկանյանը նկատեց, որ այս քայլի դրական լինելու մասին է վկայում մի կողմնակի հանգամանք ևս` ադրբեջանական կողմի անհանգստությունը, «ինչը մեկ անգամ ևս փաստում է, որ մեր երկու երկրները գնացել են ճիշտ քայլի»։
Իրանագետը նշեց, որ պատժամիջոցների հանումը Իրանի համար նոր հնարավորություններ բացեց։
«Իրանն արդեն հազարամյա պատմություն ունի մեր տարածաշրջանում և հայերիս ու Հայաստանի հետ հարաբերվելու տեսանկյունից։ Իրանն ընդհանրապես Մերձավոր արևելքում և Հարավային կովկասի տարածաշրջանում ունի կայունացնող դերակատարություն, և հայ-իրանական հարաբերությունների քաղաքական բարձր մակարդակը պետք է փոխլրացվի նաև տնտեսական և մշակութային դաշտերում»,- ասաց նա։
Ոսկանյանը կարծում է, որ այժմ առաջնային խնդիրը երկու երկրների միջև տնտեսական հարաբերությունները քաղաքական բացառիկ մակարդակին հասցնելն է, նաև երկու երկրների և ժողովուրդների միջև փոխճանաչողության խթանումը։
«Մենք որևէ սպասելիք չունենք ո՛չ Ադրբեջանից, ո՛չ Թուրքիայից, այս երկու երկրները շարունակելու են մեր մեկուսացման, մեզ շրջափակման մեջ պահելու քաղաքականությունը, որը կարելի է հաղթահարել ակտիվացնելով հարավ-հյուսիս առանցքը»,- նշեց նա։
Ոսկանյանն ընդգծեց, որ Իրանը ևս ջանքեր է գործադրում հյուսիս-հարավ առանցքի ակտիվացման ուղղությամբ, մասնավորապես` այդ երկիրը փորձում է իրար կապել Պարսից ծոցը և Սև ծովը։
