ԵՐԵՎԱՆ, 12 հուլիսի-Sputnik. Արմենուհի Մխոյան. Պերմյակովի գործով դատական նիստը հուլիսի 12-ին կայացավ առանց դատապաշտպանի ու դատախազի: Նիստին ներկա չէին նաև Ավետիսյանների իրավահաջորդներն ու իրավահաջորդների շահերի պաշտպանները: Այս մասին հայտնում է Sputnik Արմենիայի թղթակիցը Գյումրիից։
Այն մասին, որ Ավետիսյանների իրավահաջորդների շահերի պաշտպաներ-փաստաբաններից ոմանք և դատապաշտպան Էդուարդ Աղաջանյանը չեն կարող ներկա լինել այս դատական նիստին, դատավոր Հարություն Մովսիսյանը տեղեկացվել էր դեռ նախորդ՝ հուլիսի 8-ին նիստին, սակայն դատի օրը դատավորը չփոխեց՝ նշելով, որ հուլիսի 12-ին նիստը կայանալու է, քանի որ վերջիններիս ներկայությունը պարտադիր չէ՝ դատավորը հրապարակելու էր իր ինքնաբացարկի վերաբերյալ միջնորդության որոշումը: Այնպես որ դատը կայացավ Պերմյակովի, լրագրողների ու դատը հսկող իրավապահ մարմինների ներկայությամբ:
Դատը նախագահող դատավոր Հարություն Մովսիսյանը, ինչպես և սպասվում էր, իր ինքնաբացարկի միջնորդության որոշումը մերժեց՝ նշելով, որ դրա համար բավարար հիմքեր չկան:
Նշենք, որ նախորդ` հուլիսի 8-ի դատական նիստի ընթացքում Ավետիսյանների իրավահաջորդների շահերի պաշտպան Լուսինե Սահակյանը դատավորի ինքնաբացարկի որոշում ներկայացրեց՝ նշելով, որ դատավորը կաշկանդված է։ Այդ որոշման համար հիմք էր հանդիսացել այն, որ Մովսիսյանն ավելի քան մեկ ամիս առաջ ընդունել էր միջնորդություն` ՌԴ-ին հայցվոր ճանաչելու և Ավետիսյանների հարազատներին որպես ոչ նյութական՝ բարոյական վնասի փոխհատուցում 450 հազար եվրո վճարելու մասին, սակայն մեկ ամիս անց` հուլիսի 18-ին որոշել էր այն չընդունել։
Դատը հետաձգվեց մինչև հուլիսի 29-ը:
