ԵՐԵՎԱՆ, 12 հուլիսի — Sputnik. Նելլի Դանիելյան. Վերջն ավերիչ կարկուտը հարվածեց ոչ միայն գյուղացու, այլև շարքային սպառողի գրպանին։ Այսօր արդեն երևանյան վաճառակետերում մրգի ու բանջարեղենի գնորդներն ու վաճառողները դժգոհում էին, որ մեծածախ շուկայում դրանց գինը շեշտակի աճել է։
Բնության անբարեհաճությունից շահեցին նրանք, ովքեր հասցրել էին հավաքել ու ամբարել բերքը, կամ նրանք, ովքեր գյուղացուց նախապես գնել էին այն` վերավաճառելու նպատակով։ Ինքը` գյուղացին, ինչպես միշտ, մնաց միայնակ բնության հետ անհավասար պայքարում։
Հայաստանի սպառողների միության նախագահ Արմեն Պողոսյանը հիշեցնում է, որ երկու տարի առաջ գյուղնախարարությունը հայտարարեց, որ պատրաստվում է դեմքով շրջվել դեպի գյուղացին։
«Շատ լավ լոզունգ է, շատ ճիշտ ճանապարհ է, բայց ես գործնական քայլերը չտեսա»,- ասաց նա։
Ինչ վերաբերում է կարկուտի հասցրած վնասների հետևանքով գյուղատնտեսական արտադրանքի գների աճին, սպառողների միության նախագահը լավատես է և շեշտակի գնաճ չի կանխատեսում։
«Կարկուտն ամեն տեղ չի եղել, դրանք որոշ տարածքներ են։ Ես կարծում եմ, որ դա ամբողջի վրա չի տարածվի, և դրա ազդեցությունը գնի վրա չի լինի կամ քիչ կլինի»,- ասաց նա։
Անդրադառնալով հակակարկտային կայանների ոչ այնքան արդյունավետ աշխատանքին ու դրանց փոխարեն մետաղական ցանցեր տեղադրելու մասին` վերջին շրջանում հնչող առաջարկներին` Արմեն Պողոսյանն այս հարցում նույն լավատեսությունը չհայտնեց։ Նրա համոզմամբ` այդ նոր լրացուցիչ ծախսն այսօր հայ գյուղացու գրպանին բոլորովին չի համապատասխանում։
