ԵՐԵՎԱՆ, 12 հուլիսի-Sputnik. Ղազախստանի նախագահ Նուրսուլթան Նազարբաևն օրենք է ստորագրել Եվրասիական տնտեսական միությունում դեղերի շրջանառության միասնական կանոններին Հայաստանի միանալու մասին արձանագրության վավերացման մասին, երեքշաբթի հաղորդել է երկրի ղեկավարի մամուլի ծառայությունը։
«Երկրի ղեկավարը ստորագրել է «2014թ.-ի դեկտեմբերի 23-ի ԵՏՄ շրջանակում դեղամիջոցների միասնական սկզբունքների և գործելակերպի մասին համաձայնագրին Հայաստանի միանալու մասին արձանագրության վավերացման մասին» օրենքը», — ասվում է հաղորդագրությունում։
ԵՏՄ շրջանակում բժշկական արտադրանքի շրջանառության միասնական սկզբունքները ենթադրում են շրջանառության մեջ մտնելուց առաջ դեղորայքի ընդհանուր մակնշում, բժշկական հաստատությունների անձնակազմի և հիվանդների անվտանգության նորմերի համապատասխանեցում։ ԵՏՀ խորհրդի որոշումներով հաստատվել են նաև դեղերի տեխնիկական փորձարկումների կանոնները և կազմակերպության անդամ երկրներում արտադրանքի միասնական ռեեստրը։
