ԵՐԵՎԱՆ, 9 հուլիսի — Sputnik. Վրաստանի իշխանությունը քննարկում է Դարիալի կիրճում թունել կառուցելու տարբերակը, ինչը կարող է սելավի և սողանքների գոտին շրջանցող այլընտրանքային ճանապարհ լինել: Sputnik Գրուզիայի հաղորդմամբ՝ այս մասին հայտնել է Վրաստանի ավտոճանապարհային դեպարտամենտի նախագահ Գեորգի Սետուրիձեն:
«Դարիալի կիրճում երթևեկությունն այս պահին վերականգնվել է սելավից հետո: Եթե 2014 թվականի նման դեպքեր չլինեն, ճանապարհը բաց կլինի: Սակայն այս ամենը ժամանակավոր է, քանի դեռ նոր բնական աղետներ չեն եղել: Ամեն դեպքում պետք է ապահովության համար հիմնավոր որոշում կայացնել խնդիրը կանխելու համար: Ես համարում եմ, որ պետք է թունել կառուցվի», — ասել է Սետուրիձեն:
Նա ընդգծել է, որ «թունելը պետք է կառուցել այնպես, որ շրջանցի բնական աղետների էպիկենտրոնը և տրանսպորտային միջոցներին անվտանգ երթևեկելու հնարավորություն տա»:
Սետուրիձեի խոսքով` Դարիալի կիրճին հարող տարածքը (մինչև Դևդորակ սառցադաշտ) վերջին ժամանակաշրջանում վտանգավոր է դարձել. հաճախակի են դարձել սելավի և սողանքների դեպքերը:
«Չի կարելի հույս դնել կանխատեսումների վրա: Խնդիրը հնարավոր կլինի լուծել միայն թունել կառուցելու միջոցով: Մի քանի տարբերակ է ուսումնասիրվում, թեև մենք ավելի շատ հակված ենք թունելի կառուցմանը և կառավարության կարգադրությամբ շատ շուտով վերջնական որոշում կկայացնենք», — ասել է Սետուրիձեն:
Վրաստանի ավտոճանապարհների դեպարտամենտի ղեկավարը նշել է, որ եթե թունելի կառուցման հարցն առաջիկայում լուծվի, ամեն ինչ կանեն, որ այն կառուցվի մինչև սելավների նոր հոսքերը:Վրաստանի ավտոճանապարհների դեպարտամենտի ղեկավարը նշել է, որ եթե թունելի կառուցման հարցն առաջիկայում լուծվի, ամեն ինչ կանեն, որ այն կառուցվի մինչև սելավների նոր հոսքերը:
Լարսի ճանապարհը փակվել էր հունիսի 23-ին Թերեք գետի մակարդակի բարձրացման հետևանքով: Քանդվել էր Մցխեթա-Ստեփանծմինդա-Լարս ճանանապարհի (134-135 կմ) ավելի քան 800 մետր հատվածը: Ճանապարհը կրկին բացվեց միայն հուլիսի 6-ին: Ներկա պահին այս ճանապարհով թույլատրվում է երթևեկել առավոտյան ժամը 5:30-ից մինչև երեկոյան ժամը 20:00-ն:
Բոլոր տրանսպորտային միջոցների համար գործում է հատուկ ռեժիմ. միաժամանակ երկու կողմերից հանդիպակաց երթևեկությունն արգելվում է, երթևեկությունն իրականացվում է առանց կանգառների, ինտենսիվ տեղումների դեպքում արգելվում է տրանսպորտային միջոցների երթևեկությունը:
«Շրջակա միջավայրի պահպանման նախարարության հերթապահ ներկայացուցիները գտնվում են բարձր լեռներում: Այնտեղից նրանք հետևում են վտանգավոր գործընթացների զարգացմանը: Դրա համար լավ տեսանելիություն է պետք` հավանական վտանգի մասին մեզ տեղեկացնելու համար: Այդ պատճառով գիշերը երթևեկությունը դեռ սահմանափակվում է», — ասաց Սետուրիձեն:
Ճանապարհը նախատեսվում էր բացել հուլիսի 4-ին, սակայն բացումը հետաձգվեց, քանի որ շրջակա միջավայրի նախարարությունը հայտնեց, որ հուլիսի 4-7ը Արևելյան Վրաստանում առատ տեղումներ են սպասվում, ինչը կարող է սելավի և սողանքների պատճառ դառնալ:
Սելավից անմիջապես հետո Վրաստանի իշխանությունը սկսեց պայքարել բնական աղետի հետևանքների դեմ: Առաջնային խնդիրը Թերեք գետի հունը վերականգնելն էր, ինչը հնարավոր դարձավ վեց օր անընդմեջ աշխատելու արդյունքում:
Վերին Լարսի անցակետի փակման հետևանքով Հայաստանը կտրվեց Ռուսաստանի հետ ունեցած ցամաքային ճանապարհից: Հայաստանի քաղաքացիները շրջափակման մեջ մնացին, շուրջ 300 ՀՀ քաղաքացու տեղափոխումն իրականացվեց Ռուսաստանի ԱԻՆ ավիացիայի աջակցությամբ: Ճանապարհին էին մնացել նաև մթերքով բեռնված ավտոմեքենաները, որոնք Ռուսաստան տեղափոխվեցին լաստանավերով:
