ԵՐԵՎԱՆ, 9 հուլիսի — Sputnik, Նելլի Դանիելյան. Ավիացիայի ոլորտում գնագոյացման խնդիրը մտահոգում է նաև ՀՀ էկոնոմիկայի նախարար Արծվիկ Մինասյանին։
«Կարծում եմ, որ սա թե՛ էկոնոմիկայի նախարարության, թե Տնտեսական մրցակցության պաշտպանության պետական հանձնաժողովի քննարկման հարց պետք է դառնա։ Մենք արդեն նախաձեռնել ենք հարցի քննարկումները»,- ասաց նախարարը` հավելելով, որ քննարկման արդյունք առայժմ չկա, իսկ միջանկյալ կամ նախնական արդյունքներ հրապարակել չի ցանկանում։
Հիշեցնենք` ՀՀ ԱԺ պատգամավոր Էդմոն Մարուքյանն օրեր առաջ դիմել էր ՀՀ տնտեսական մրցակցության պաշտպանության պետական հանձնաժողով: Պատգամավորի հաղորդման համաձայն` Վերին Լարսի անցակետի փակման փաստից օգտվելով՝ ավիաընկերությունները եռապատիկ բարձրացրել են դեպի Ռուսաստանի Դաշնություն (հատկապես Մոսկվա) ավիատոմսերի գները։
«Ավիափոխադրումների գնագոյացման և հատկապես հնարավոր դեմպինգային գործողությունները բացահայտելու և շուկան, ծառայություններ մատուցողների ու սպառողների իրավունքները պաշտպանելու առումով կարիք ունենք շատ լուրջ վերանայումների»,- ասաց Արծվիկ Մինասյանը։
