ԵՐԵՎԱՆ, 8 հուլիսի-Sputnik. Երևանի քաղաքապետարանի «Երևանյան ամառ-2016» եռամսյա միջոցառումների ծրագրով հուլիսի 9-ին Երևանում 2-րդ տարին անընդմեջ կանցկացվի «Գունազարդ վազք» մարզական, ժամանցային միջոցառումը։ Այս մասին հայտնում է Երևանի քաղաքապետարանի մամուլի ծառայությունը:
Վազքարշավի օրակարգը և մանրամասները ներկայացրել են Երևանի քաղաքապետարանի աշխատակազմի քարտուղարի տեղակալ, Երևանի քաղաքապետին կից երիտասարդության հարցերի խորհրդի փոխնախագահ Սամվել Մերթարջյանը, «Run Armenia» նախագծի հիմնադիր-նախագահ Ղազար Հակոբյանը և «Ամերիաբանկի» մարքեթինգի բաժնի ավագ մասնագետ Գայանե Մանուկյանը:
Վազքարշավն իրականացվում է «Run Armenia» նախագծի նախաձեռնությամբ, Երևանի քաղաքապետարանի, Երևանի քաղաքապետին կից երիտասարդության հարցերի խորհրդի աջակցությամբ:
Սամվել Մերթարջյանը նշել է, որ Երևանի քաղաքապետարանը, կարևորելով երիտասարդության ներգրավվածությունը մայրաքաղաքային տարբեր միջոցառումներում, նաև խթանելով առողջ ապրելակերպի տարածումը, այս նախաձեռնությունը կյանքի է կոչում մասնավոր հատվածի և ՀԿ-ների հետ համատեղ, ինչը համագործակցության հերթական օրինակն է:
Սամվել Մերթարջյանը ներկայացրել է նաև բակային տարածքներում մարզասարքերի տեղադրման, մարզադպրոցների նորոգման և քաղաքապետարանի ծրագրերով իրականացվող բազմաթիվ այլ նախաձեռնություններ: «Run Armenia» նախագծի հիմնադիր-նախագահ Ղազար Հակոբյանը նշել է, որ քաղաքապետարանը քաղաքային ծրագրերի, իսկ այս պարագայում երիտասարդական նախաձեռնությունների իրականացման գործում վստահելի գործընկեր է, որի հետ համագործակցությունը շարունակական կլինի:
«Գունազարդ վազքը» կամ «Color run Yerevan —2016»-ը միջազգային ձևաչափ ունեցող միջոցառում է, որն անցկացվում է աշխարհի տարբեր երկրներում՝ Ռուսաստան, ԱՄՆ, Ավստրալիա, Բրազիլիա, Կանադա, Չիլի, Չինաստան:
«Գունազարդ վազք» նախագիծը Երևանում անցկացվում է 2015 թվականից:
Սովորական վազքարշավների համեմատ այս միջոցառումը ոչ միայն մարզական ուղղվածություն ունի, այլև դիտարկվում է որպես զվարճանք, քանի որ վազորդները պատվում են էկոլոգիապես մաքուր, բացարձակ անվնաս գունավոր փոշեներկերով:
Նպատակներից մեկն էլ նման մարաթոնների միջոցով Երևանի բնակիչների և հատկապես երիտասարդության շրջանում առողջ ապրելակերպ քարոզելն է, ինչպես նաև վազքի մշակույթը և զանգվածային սպորտը զարգացնելը: Վազքարշավի հասույթը կուղղվի բարեգործական նպատակի, մասնավորապես` Գյումրու անօթևան ընտանիքների բնակարանային խնդիրների լուծմանը:
Մարզական միջոցառումը կմեկնարկի առավոտյան ժամը 07:00-ին՝ մասնակիցների գրանցումով ու առավոտյան նախավարժանքով, Կարեն Դեմիրճյանի անվան Մարզահամերգային համալիրի հարակից տարածքից: Վազքարշավի մեկնարկը կտրվի ժամը 9:00-ին: Վազքուղին տարածվելու է Իսակովի պողոտան Լենինգրադյան փողոցին կապող հատվածում: Վազքարշավը մրցութային չէ, սակայն վազքուղին առաջինը հատած երեքական տղաներն ու աղջիկները կպարգևատրվեն մրցանակներով:
Վազքուղու ավարտին կհաջորդեն երաժշտական գունազարդ «հրավառությունն» ու «Color Dance Party» դիսկոտեկը: «Yerevan Color Run» միջոցառումից առաջ անցկացվել է հատուկ գունազարդ լուսանկարահանում՝ ճանաչված արտիստների, երգիչների ու հաղորդավարների հետ:
