ԵՐԵՎԱՆ, 7 հուլիսի-Sputnik. Այս կամ այն պետության կառուցողական դերը կարող է միայն ողջունվել, ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան` մեկնաբանելով ՌԼԴԿ առաջնորդ Վլադիմիր Ժիրինովսկու այն խոսքերը, որ Ռուսաստանի և Թուրքիայի մերձեցումը կօգնի տարածաշրջանային հակամարտության լուծմանը։
«Լեռնային Ղարաբաղի հետ կապված գոյություն ունեն համապատասխան ձևաչափեր` ԵԱՀԿ Մինսկի խումբը, Հայաստանի և Ադրբեջանի հետ մեր ուղիղ երկխոսությունը, բարձր մակարդակի հանդիպումները, որոնք տեղի են ունենում Ռուսաստանի, Հայաստանի և Ադրբեջանի նախագահների միջև։ Անկեղծ ասած` մենք կարծում ենք, որ դա բավարար է, և դա գործող մեխանիզմ է։ Այս կամ այն պետության ցանկացած կառուցողական դեր միայն ողջունելի է»,- ասաց Զախարովան։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Հայաստանի և Ադրբեջանի նախագահների հանդիպումների մասին կարող եք կարդալ այստեղ >>
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
