ԵՐԵՎԱՆ, 7 հուլիսի — Sputnik. Վարչապետ Հովիկ Աբրահամյանը կարծում է, որ մեզ անհրաժեշտ են մատչելի, մրցունակ ու հայրենասիրության տարրեր պարունակող կրթական ծրագրեր։ Բացի այդ, նա ԿԳ նախարար Լևոն Մկրտչյանին հորդորեց նոր մեխանիզմներ մշակել դպրոցի տնօրենի ընտրության հարցում։
«Դպրոցի ղեկավարի նշանակումը, սկսած նրա հավաստագրումից մինչև ընտրությունը, պետք է դառնա պարզ ու թափանցիկ»,-ասաց նա։
Վարչապետի խոսքով` վերանայման անհրաժեշտություն ունեն դպրոցների կառավարման խորհուրդների գործունեության ու դրանց ֆինանսավորման հետ կապված հարցերը։
«Վերանայման և կատարելագործման կարիք ունեն դպրոց-բուհ անցումն ապահովող կառույցների գործառույթները։ Նպատակահարմար է այս գործընթացը դարձնել ավելի սահուն` նպաստելով բարձրագույն կրթության մատչելիության բարձրացմանը, հասարակության սոցիալապես անապահով խավերի ընդգրկմանը»,-ասաց Աբրահամյանը։
Նիստից հետո ԿԳ նախարար Լևոն Մկրտչյանը լրագրողների հետ զրույցում նշեց, որ վարչապետի մոտ կլինի երկու խորհրդակցություն, որից հետո իրենք դուրս կգան հանրային քննարկումների։ Նա տեղեկացրեց նաև, որ այս պահին շրջանառության մեջ է կրթության զարգացման տասնամյա ծրագիրը, որը մոտ ապագայում կմտնի Կառավարության օրակարգ։
«Եթե համակարգային ճիշտ փոփոխություններ անենք ու ճիշտ լուծումներ գտնենք, մեծապես կնվազեն կոռուպցիոն ռիսկերը։ Օրինակ` մենք ունենք բարեվարքության կանոնակարգ, որը պարտադիր պետք է մտցնենք բարձրագույն ուսումնական հաստատություններ։ Դա առնչվում է բուհի ներքին էթիկայի չափորոշիչների ձևավորման հետ։ Առանց դրա բուհական որակի մասին խոսել չի լինի։ Դա ուղիղ վերաբերում է կոռուպցիոն ռիսկերի նվազեցմանը»,-ասաց Մկրտչյանը։
Վերջում նա հատուկ ընդգծեց, որ կրթական ոլորտի խնդիրներն ուղիղ համեմատական են աշխատաշուկային։ Ասենք, եթե ֆիզիկոսները մեր երկրում քիչ են, նշանակում է, որ աշխատանք գտնելու խնդիր կա։ Բացի այդ, երկրի բյուջետային հնարավորությունները հանգեցրել են ցածր աշխատավարձերի, ինչը ևս ազդում է կրթություն ստանալու վրա։
