ԵՐԵՎԱՆ, 6 հուլիսի — Sputnik. Հուլիսի 6-ին, ժամը 13.10-ին ահազանգ է ստացվել, որ Արագածոտնի մարզի Ապարան քաղաքի Բաղրամյան-Խաչատրյան-Շահումյան փողոցներում գտնվող տները հորդառատ անձրևների հետևանքով ջրալցվում են: Այս մասին հայտնում է ՀՀ արտակարգ իրավիճակների նախարարության մամուլի ծառայությունը։
Դեպքի վայր են մեկնել մեկ մարտական հաշվարկ, մարզային ճգնաժամային կառավարման կենտրոնի և հրշեջ-փրկարարական ջոկատի օպերատիվ խմբերը:
Պարզվել է, որ Շահումյան փողոցի թիվ 26 տան 1-ին հարկը ջրալցվել է, 3 երեխաները 2-րդ հարկում են և չեն կարողանում դուրս գալ տանից. դուրս բերելու համար անհրաժեշտ է փրկարարների օգնությունը:
Մինչ հրշեջ-փրկարարների կանչի վայր հասնելը երեխաները տանից դուրս են բերվել տեղի ուժերով:
Ըստ տեղեկության՝ անձրևաջրերը լցվում են Մաշտոցի փողոցի թիվ 36 (սեփականատեր Մ. Խ.), Բաղրամյան փողոցի թիվ 48 (սեփականատեր Ա. Ա.), Շահումյան փողոցի թիվ 26 (սեփականատեր Ա. Գ.), Ա.Խաչատրյան փողոցի թիվ 1 (սեփականատեր Ն. Հ.) տները, Գ.Նժդեհի փողոցի թիվ 3 շենքի մուտքը և Գ.Նժդեհի անվան թիվ 2 միջնակարգ դպրոցը:
Հրշեջ-փրկարարները քաղաքապետարանի աշխատակիցների հետ համատեղ Բաղրամյան, Խաչատրյան, Գ.Նժդեհի, Մաշտոցի և Շահումյան փողոցներում իրականացրել են ջրի հոսքի փոփոխման աշխատանքներ և բացել նշված փողոցներում գտնվող դիտահորերի կափարիչները, իսկ Գ.Նժդեհի փողոցի թիվ 3 շենքից մեկ երեխա դուրս են բերել շենքից:
Փրկարարները Շահումյան փողոցի տներից մեկում բնակիչների հետ համատեղ իրականացրել են ջրահեռացման աշխատանքներ:
