ԵՐԵՎԱՆ, 6 հուլիսի — Sputnik. Հենրիկ և Գերոնտի Թալալյան եղբայրների անվան 7-րդ փառատոնի փակման համերգը կայացավ Կոմիտասի անվան կամերային երաժշտության տանը։
Միջոցառումը հանրապետական է, բայց փառատոնին, ինչպես միշտ, միացան նաև օտարերկրյա հյուրերը։
«Այս տարի մենք չորս հյուր ունենք` ջութակահար Տիգրան Մահտեսյանը Բելգիայից, ջութակահարներ Անի Աղաբեկյանը և Տիգրան Հախումյանը Գերմանիայից, դաշնակահար Դմիտրի Նովգորոդսկին ԱՄՆ-ից։ Բոլորը հրաշալի երաժիշտներ են ու մեր ընկերները», — Sputnik Արմենիայի թղթակցի հետ զրույցում ասաց փառատոնի տնօրեն Ջուլիետա Վարդանյանը։
Նրա խոսքով` Դմիտրի Նովգորոդսկին վարպետության դասեր է անցկացրել Կոմիտասի անվան Երևանի պետական կոնսերվատորիայում և անչափ տպավորված է հայ երիտասարդների վարպետությամբ։
«Ես և իմ գործընկերները մեծ նշանակություն ենք տալիս այն հանգամանքին, որ հայ երիտասարդ երաժիշտները մասնակցեն նաև այլ երկրներում անցկացվող փառատոներին։ Շատ կարևոր է, որ նրանք համագործակցեն համաշխարհային մեծության երաժիշտների հետ», — ավելացրեց Sputnik Արմենիայի զրուցակիցը։
![Джульета Варданян Джульета Варданян - Sputnik Արմենիա](https://cdn.am.sputniknews.ru/img/421/13/4211376_0:0:1600:1024_600x0_80_0_0_ac5c474663eca8aa22190da48c5f9072.jpg)
Նրա խոսքով` այս տարի փառատոնին մասնակցել են տարբեր երաժշտական մրցույթների մասնակցած ու դափնեկիր դարձած երիտասարդ թավջութակահարները։
Միջոցառումն ընդհանրապես տևում է շուրջ երկու ամիս։ Այս տարի հնչեց նաև մաեստրո Ալեքսեյ Կուրկջյանի «Brazil'IAN» ստեղծագործությունը, որը նվիրված էր Հայոց ցեղասպանության զոհերին։
Թալալյան եղբայրների անվան փառատոնը հիմնադրվել է 2008 թվականին։ Նախագծի նպատակը երիտասարդ տաղանդավոր երաժիշտներին ինքնադրսևորվելու հնարավորություն ընձեռելն է, ինչպես նաև` ժամանակակից հայկական երաժշտության տարածումը։
![Թալալյան եղբայրների փառատոնը Թալալյան եղբայրների փառատոնը - Sputnik Արմենիա](https://cdn.am.sputniknews.ru/img/421/12/4211212_37:0:1588:974_600x0_80_0_0_f25f7863bf2291a4ad31c546cd293b05.jpg)
![Թալալյան եղբայրների փառատոնը Թալալյան եղբայրների փառատոնը - Sputnik Արմենիա](https://cdn.am.sputniknews.ru/img/421/12/4211294_0:1:1599:1007_600x0_80_0_0_8550c360e72384059d55a7af79bc999c.jpg)
![Թալալյան եղբայրների փառատոնը Թալալյան եղբայրների փառատոնը - Sputnik Արմենիա](https://cdn.am.sputniknews.ru/img/421/15/4211501_0:1:1600:1007_600x0_80_0_0_0aa65e969ccaedcb6f188afaf299ef60.jpg)
![Թալալյան եղբայրների փառատոնը Թալալյան եղբայրների փառատոնը - Sputnik Արմենիա](https://cdn.am.sputniknews.ru/img/421/16/4211632_141:0:1600:917_600x0_80_0_0_d8a0f71b4a19fae657f8eb10dcf37f36.jpg)
Փառատոնը նպաստում է հայկական սփյուռքի և արտասահմանյան երաժիշտների միջև մշակութային փոխանակման խթանման համար բարենպաստ հարթակ ստեղծելուն։ Նախագծի խնդիրներից մեկը երիտասարդ կատարողների առաջխաղացման համար հատուկ կրթական ծրագրերի ստեղծումն է, ինչպես նաև` տարածաշրջանային երաժշտական կենտրոնների ծրագրերի մշակումը, նախագծումն ու իրականացումը։
Հինգ համերգի ընթացքում հնչել են ինչպես եվրոպացի (Պերգոլեզի, Վիվալդի), այնպես էլ ժամանակակից հայ կոմպոզիտորների ստեղծագործությունները ։
2016 թվականին կայացած համերգները նվիրված են եղել Առնո Բաբաջանյանի, Էդվարդ Միրզոյանի, Գերոնտի Թալալյանի և Միխայիլ Կոկժաևի հոբելյաններին։
Փառատոնն անցկացվում է «Արս Լունգա» հասարակական կազմակերպության նախաձեռնությամբ և Հայաստանի մշակույթի նախարարության աջակցությամբ։