Լաուրա Սարգսյան, Sputnik.
Գերմանիայի արտակարգ և լիազոր դեսպան Մաթիաս Քիեսլերը Հայաստանը համարում է հարուստ մշակույթ և պատմություն ունեցող երկիր, որով պետք է հպարտանալ։ «Մենք ուրախ ենք հայ-գերմանական համագործակցության համար, «Ոսկե ծիրանը» դրա ապացույցներից մեկն է», — Sputnik Արմենիայի թղթակցի հետ զրույցում ասաց Քիսլերը։
«Ոսկե ծիրան» փառատոնի գոյության 13 տարվա ընթացքում փառատոնին է ներկայացվել ավելի քան 200 գերմանական ֆիլմ։
Դիվանագետի խոսքով` Հայաստանն ու Գերմանիան համագործակցում են նաև տնտեսական և այլ ոլորտներում` աստիճանաբար խորացնելով հարաբերությունները։ Այսպես, ապրիլին տեղի ունեցավ գերմանական տնտեսական միավորման բացումը, որի նպատակը հայ-գերմանական առևտրային կապերի խորացումն ու ներդրումների ներգրավումն է։
«Ես երեկ եմ խոսել գերմանացի պոտենցիալ ներդրողներից մեկի հետ, որը մտադիր է ներդրում կատարել արդյունաբերության ոլորտում», — նշեց դեսպանը` չներկայացնելով զրույցի մանրամասները։ Գերմանացի դիվանագետը կարծում է, որ Հայաստանում իր գործունեության մեկ տարվա ընթացքում երկկողմ հարաբերությունների խորացման հիմք է դրվել, թեև անելիքներ դեռ շատ կան։ Մոտ ապագայում Հայաստանի դպրոցներից մեկում հայ-գերմանական բիլենգ ուսուցման ծրագիր կներդրվի։
«Կարծում եմ, որ անհրաժեշտ է ներդրում կատարել ՏՏ ոլորտում, միևնույն ժամանակ չմոռանալ արտադրության ոլորտի մասին, անկախ նրանից, որ Հայաստանը փոքր շուկա ունեցող երկիր է։ Սակայն նոր իրողությունները հաշվի առնելով` Հայաստանում արտադրված արտադրանքը կարող է արտահանվել ԵՏՄ մեծ շուկա», — ասաց Քիսլերը։
Գերմանիան Հայաստանի երրորդ խոշոր տնտեսական գործընկերներն է, հայկական շուկայում գործում է շուրջ 700 գերմանական ընկերություն։ Իր դիվանագիտական ծառայության մասին խոսելիս` դեսպանը խոստովանեց, որ այդ առաքելությունը միանգամից չի ընտրել։ Առաջին մասնագիտությամբ ինժեներ է և, տարբեր ոլորտներում աշխատելով, հասկացել է, որ իրեն ավելի շատ դիվանագիտությունն է հետաքրքրում։
Երևանում մեկ տարվա գործունեությունն ամփոփելով` Քիսլերն ասաց, որ հայկական ազգային խոհանոցից նախընտրում է տոլման և շատ է սիրում հայկական ծիրանը։ Նշենք, որ գերմանական ֆիլմի սիրահարների համար «Ոսկե ծիրան» միջազգային փառատոնը դռները կբացի հուլիսի 12-ին։
