ԵՐԵՎԱՆ, 6 հունիսի – Sputnik. Այսօր լրագրողների հետ հանդիպման ժամանակ, անդրադառնալով ռուս-թուրքական հարաբերությունների ջերմացմանը, «Մոդուս վիվենդի» կենտրոնի հիմնադիր և նախագահ Արա Պապյանն ասաց. «Էրդողանը Պուտինից ներողություն չի խնդրել. ընդամենը զոհերի ընտանիքներին ցավակցություն է հայտնել ու ասել` անցած լինի»։ Քաղաքագետը նաև հիշեցրեց, որ Էրդողանի նամակին հետևեց Ստամբուլի օդանավակայանում իրականացված ահաբեկչությունը, որը պատճառ առիթ դարձավ, որպեսզի ՌԴ նախագահը զանգահարի Էրդողանին և զրույցի արդյունքում հաշտվի նրա հետ։
«Ես կարծում եմ բուն դրդապատճառը երկուսի համար էլ մեկուսացումն ու լարված հարաբերություններն են Արևմուտքի հետ,- ասաց Պապյանը։- Եթե Ռուսաստանի համար 1917թ-ից հետո հակադարձվածությունն Արևմուտքին ստրատեգիական խնդիր է, ապա Թուրքիայի համար դա տակտիկական խնդիր է. նա երբեմն Արևմուտքին է հակադրվում, երբեմն` այլ բևեռի»։
Ինչ վերաբերում է հարցին, թե իրադրության փոփոխությունն ինչպես կազդի Հայաստանի վրա, Արա Պապայանը մտավախություն ունի, որ, ինչպես 1 դար առաջ, այնպես էլ այսօր մենք այս հարցում շահող կողմ չենք լինի` այն տարբերությամբ, որ եթե անցած դարի 20-ական թվականներին քաղաքական խաղասեղանին դրվեցին Կարսն ու Սուրմալուն, այսօր կարող է դրվել Ղարաբաղը։
«Էրդողանը փորձեց հերթական անգամ խաղարկել այն, ինչ 20-ականներին արել էին ու հաջողել, այսինքն` երբ երկու մեկուսացած պետություն սկսեցին իրար հետ մերձենալ։ Այդ պատճառով ես մտավախություն ունեմ, որ այդ նույն սցենարը կարող է հիմա էլ կրկնվի»,- ասաց Արա Պապյանը։
Ռուս-թուրքական հաշտեցումից որոշ մտավախություն ունի նաև ՀՀ ԱԺ ՀՀԿ խմբակցության պատգամավոր Շիրակ Թորոսյանը, որը Թուրքիայի բոլոր աշխարհաքաղաքական ու տարածաշրջանային ծրագրերում հակահայկական տարր է նկատում։ Պատգամավորը չի բացառում, որ ՌԴ-ի հետ հաշտեցումը Թուրքիան նույնպես կծառայեցնի իր հակահայկական ծրագրերին։ Ուստի Հայաստանն իր ռազմավարական գործընկերոջ հետ հարաբերություններում պետք է փորձի կանխել Թուրքիայի նման փորձերը։
«Դա ամբողջապես կուղղվի մեր դեմ, և Թուրքիան կստանա որոշակի ձեռքբերումներ, եթե թուրքական հակահայկական քաղաքականությանն ընդառաջի կամ թողտվություն ցուցաբերի նաև Ռուսաստանը»,- ասաց Շիրակ Թորոսյանը։
Նրա խոսքով` քանի որ Հայաստանը ռազմավարական հարաբերություններ ունի Ռուսաստանի հետ, ապա պետք է դիվանագիտական և մյուս բոլոր մեթոդներով դիմագրավի թուրքական ձգտումներին և թույլ չտա, որ ռուս-թուրքական հարաբերությունները կարողանան վնասել մեզ։
Ի տարբերություն Հայաստանի, Ադրբեջանը, բանախոսների կարծիքով, ավելի շատ կշահի ռուս-թուրքական հարբերությունների ջերմացումից։ Արա Պապյանի խոսքով` եթե Թուրքիայի և Ռուսաստանի հարաբերությունների խզումից հետո այդ երկիրը հայտնվել էր անախորժ վիճակում, ապա այսօր արդեն իր ծրագրերը դարձյալ կապում է Ռուսաստանի հետ։
«Ռուսաստանն էական տնտեսական շահեր ունի Ադրբեջանում և Թուրքիայում, հետևաբար իր քաղաքականությունը միշտ հակված է լինելու դեպի այդ ուղղությունը»,- ասում է քաղաքագետը` հիշեցնելով, որ ի տարբերություն այդ երկրների, Հայաստանն արդեն ՌԴ քաղաքականության տիրույթում է։
Ի դեպ, Արա Պապյանի կարծիքով, Ռուսաստանը նաև քայլեր է անում Ադրբեջանին ԵՏՄ կազմում ընդգրկելու ուղղությամբ։ Բայց քաղաքագետը հուսով է, որ Ադրբեջանն այդ քայլին չի գնա` իր նավթագազային ազատությունը չկորցնելու մտավախությամբ։
