ԵՐԵՎԱՆ, 5 հուլիսի — Sputnik. Ղարաբաղյան հակամարտության լուծման համար պետք չէ ներգրավել նոր բանակցողներ, բավական է ապահովել Մինսկի խմբի պայմանավորվածությունները, կարծում է Ղազախստանի ԱԳՆ ղեկավար Երլան Իդրիսովը։
«Ստեղծվել է Մինսկի հատուկ խումբը, որի համանախագահներն են Ռուսաստանը, ԱՄՆ-n և Ֆրանսիան։ Կարծում եմ, որ ղարաբաղյան հակամարտության լուծման համար նոր միջնորդներ որոնելու անհրաժեշտություն չկա»,- ասել է Իդրիսովը Աստանայում տեղի ունեցած ճեպազրույցում։
Արտգործնախարարի կարծիքով` Մինսկի խմբի շրջանակում հստակ ձևավորվել են Ղարաբաղում հակամարտության կարգավորման սկզբունքներ, ուստի պետք է ապահովել այդ պայմանավորվածությունների իրագործումը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
