ԵՐԵՎԱՆ, 4 հուլիսի — Sputnik. ՀՀ ԱԻ նախարարությունը տեղեկացնում է, որ հորդառատ անձրևների պատճառով, ելնելով մարդկանց անվտանգությունից, Լարսի ավտոճանապարհը այսօր ժամը 17.00-ին չի բացվել:
Նախնական տվյալով` ճանապարհը կբացվի վաղը՝ հուլիսի 5-ին:
Հունիսի 30-ից հուլիսի 1-ը ռուսական օդանավի 6 չվերթով Ռուսաստանի Դաշնությունից Հայաստան է տեղափոխվել Լարսի անցակետի փակման հետևանքով Հայաստան վերադառնալու հնարավորությունից զրկված ՀՀ 289 քաղաքացի (այդ թվում` 73 կին, 31 երեխա)։ Նույն ժամանակահատվածում Հայաստանից նույն ինքնաթիռով Ռուսաստան է տեղափոխվել ՌԴ 13 քաղաքացի (այդ թվում` 2 կին, 2 երեխա): Առաջնահերթ նախապատվությունը տրվել է ծերերին, կանանց և երեխաներին:
ՀՀ ԱԻՆ խնդրանքով` նախատեսված 4-ի փոխարեն ՌԴ ԱԻՆ «ԱՆ-148» օդանավն իրականացրել է ևս 2 լրացուցիչ չվերթ։
ՀՀ ԱԻ նախարար Արմեն Երիցյանի կարգադրությամբ` Երևանի «Զվարթնոց» միջազգային օդանավակայանում սահմանվել է ՀՀ ԱԻՆ փրկարար ծառայության ղեկավար կազմի և աշխատակիցների շուրջօրյա հերթապահություն, ծավալվել են ԱԻՆ բժշկական, հոգեբանական և տեղեկատվական ծառայությունների արձագանքման կետեր` Բեսլանի օդանավակայանից ժամանող ՀՀ քաղաքացիներին օգնություն տրամադրելու համար:
Լարսի անցակետի մոտ ծավալված ժամանակավոր ճամբարներում գրանցված բոլոր ՀՀ քաղաքացիները ՌԴ ԱԻՆ օդանավով տեղափոխվել են Հայաստան: Ներկայումս անցակետում մնացել են միայն այնտեղ արգելափակված բեռնատար և մարդատար մեքենաների վարորդները: ՌԴ-ում ՀՀ ԱԻՆ ներկայացուցիչ, գնդապետ Ա. Ղազարյանի տվյալներով` Վրաստան-ՌԴ սահմանային հատվածում կա դեռևս ՀՀ 51 քաղաքացի (բոլորը` տղամարդ), որոնք Լարսի անցակետ են ժամանել օդանավի վերջին չվերթն իրականացնելուց հետո և վրանային ավանում գրանցված չեն:
Նշենք, որ հունիսի 23-ից սկսած ՀՀ ԱԻ նախարարությունը ստեղծված իրավիճակի մասին տեղեկատվական բոլոր խողովակներով պարբերաբար իրազեկել և զգուշացրել է բնակչությանը Լարսի անցակետի փակման մասին` հորդորելով օգտվել այլընտրանքային ճանապարհներից:
ՀՀ ԱԻՆ ճգնաժամային կառավարման ազգային կենտրոնն այսօր կապ է հաստատել Վրաստանի ՆԳՆ ԱԻ դեպարտամենտի տնօրենի տեղակալ Կախա Թերթվաձեի հետ, որի հաղորդմամբ` հուլիսի 4-ին, ժամը 17:00-ին Դարիալում ժամանակավորապես կբացվի ավտոճանապարհ 4×4 թեթև մարդատար մեքենաների համար, հատուկ ռեժիմով՝ Ներքին գործերի նախարարության հսկողությամբ: Առաջիկայում տեղեկություն կտրամադրվի նաև Լարսի ճանապարհով այլ տիպի մեքենաների (նաև ծանրաքարշ) երթևեկության հնարավորության մասին։
Հիշեցնենք, որ հունիսի 23-ին, ժամը 16:40-ի սահմաններում ՀՀ ԱԻՆ ճգնաժամային կառավարման ազգային կենտրոնում տեղեկություն է ստացվել Վրաստան-ՌԴ սահմանային անցակետի փակվելու և բոլոր տեսակի տրանսպորտային միջոցների երթևեկությունը դադարեցնելու մասին: Դրա պատճառ է հանդիսացել ժամը 16:00-ի սահմաններում Մծխեթա-Ստեփանծմինդա-Լարս ավտոճանապարհի 135-րդ կմ-ում (սահմանային անցակետից մոտ 2 կմ հեռավորության վրա) առաջացած սելավային հոսքը:
Դժվարին իրավիճակում հայտնված մեր համաքաղաքացիների աջակցությունն արդյունավետ կազմակերպելու նպատակով ՀՀ ԱԻ նախարարությունը և Հայ-ռուսական մարդասիրական արձագանքման կենտրոնը սերտորեն համագործակցել են Վրաստանի և ՌԴ իրենց գործընկերների հետ` մշտական կապ պահելով ճգնաժամային կառավարման ազգային կենտրոնների հետ:
Լարսի անցակետում մնացած քաղաքացիների գիշերակացն ապահովելու համար ՀՀ և ՌԴ ԱԻ նախարարությունների համագործակցության շրջանակներում տեղում ծավալվել է 2 վրանային ավան 10 վրան, 70 մարդու հաշվարկով, որտեղ մարդիկ ապահովվել են սննդով, սանիտարական հիգիենայի, բուժօգնության և հոգեբանական աջակցությամբ:
ՀՀ քաղաքացիներին Հայաստան տեղափոխելու հարցի լուծման նպատակով ՀՀ վարչապետ Հովիկ Աբրահամյանը նամակով դիմել է Դմիտրի Մեդվեդևին` ՌԴ ԱԻՆ օգնությամբ մարդասիրական ավիափոխադրում իրականացնելու համար, որից հետո մեկնարկեց ՀՀ և ՌԴ ԱԻ նախարարությունների, ինչպես նաև կապի ու տրանսպորտի նախարարությունների, համատեղ աշխատանքը` ՀՀ քաղաքացիների տեղափոխումը կազմակերպելու ուղղությամբ:
