ԵՐԵՎԱՆ, 3 հուլիսի — Sputnik. Հայաստանում այս պահին տեղի է ունենում անբարեխիղճ պայմանավորվածություն, այս օրերին ավիատոմսերի գները տնտեսագիտորեն անարդարացի են ձևավորվել, կարծում է ՀՀ ԱԺ պատգամավոր, «Լուսավոր Հայաստան» կուսակցության նախագահ Էդմոն Մարուքյանը։
Պատգամավորը հայտարարություն է տարածել, որտեղ ՀՀ տնտեսական մրցակցության պաշտպանության պետական հանձնաժողովին առաջարկել էր հարուցել վարույթ և միջոցներ ձեռնարկել` արդար գների վերականգնման և իրավախախտ սուբյեկտներին պատասխանատվության ենթարկելու ուղղությամբ:
«Խոսքը հիմնականում դեպի Ռուսաստան՝ Մոսկվա, Կրասնոդար, Սոչի և մյուս ուղղություններով ավիատոմսերի գների մասին է: Հիմքում ընկած է Լարսի փակվելու հանգամանքը: Այնինչ Լարսի փակվելը չի ազդել ո՛չ ավիաբենզինի, ո՛չ այլ բաների վրա, անարդարացիորեն են թանկացել ավիատոմսերի գները։ Այդպես կազմակերպված և պլանավորված շահույթի նպատակ են հետապնդում»,- նշեց պատգամավորը:
Մարուքյանը շեշտեց` այնպես չէ, որ կան ավիաընկերություններ, որոնք իրենց գները պահել են նույնը, և կան այնպիսիները, որոնք թանկացրել են: Նրա խոսքով` թանկացրել են բոլորը՝ հարվածելով սպառողի գրպանին, որը պլանավորել էր ամառվա այս ամիսների ընթացքում գալ Հայաստան կամ մեկնել Ռուսաստան:
Նա նշեց, որ ՏՄՊՊՀ-ն ունի լիազորություններ, որոնց շրջանակում կարող է վարույթ հարուցել, քննության առարկա դարձնել տոմսերի թանկացումը, ուսումնասիրել դրանց հիմքում ընկած հանգամանքները և վարույթի շրջանակում պատժամիջոցներ կիրառել ավիատոմսերը թանկացրած ավիաընկերությունների նկատմամբ և գները բերել նախկին մակարդակի: Եվ դա անկախ նրանից` տվյալ ընկերությունը հայկակա՞ն է, թե՞ ոչ, քանի որ Հայաստանում գործունեություն ծավալող բոլոր ընկերությունները ենթարկվում են ՀՀ օրենսդրությանը։
«Կարծում եմ՝ առանց իմ դիմումի դա պետք է արվեր: Ես գրավոր դիմել եմ, իմ պահանջը ներկայացրել եմ և ամեն ինչ անելու եմ, որպեսզի այդ վարույթը հարուցվի, և այն սուբյեկտները, որոնք անբարեխիղճ կերպով պայմանավորվածության են եկել ու հարվածել են մեր քաղաքացիների, Հայաստանի հյուրերի գրպաններին, պետք է պատասխանատվության ենթարկվեն»,- պնդում է պատգամավորը:
Նա նշեց, որ հայտարարությունը հրապարակել է մամուլում, հետևաբար ՏՄՊՊՀ-ն կարող է չսպասել իր նամակը պաշտոնապես ստանալուն, այլ կարող է վարույթը սկսել ու համապատասխան միջոցներ ձեռնարկել:
Մարությանն իր հայտարարության մեջ նշել էր, որ առկա է հիմնավոր կասկած առ այն, որ բոլոր ընկերությունները պայմանավորվել են գների միաժամանակյա բարձրացման վերաբերյալ, քանի որ այս ժամանակահատվածում վառելիքի էական թանկացում կամ այլ օբյեկտիվ պատճառներ չկան, որոնք կարող են ազդել ավիատոմսերի գների աճի վրա:
