ԵՐԵՎԱՆ, 3 հուլիսի — Sputnik, Արմենուհի Մխոյան. Շտապ բուժօգնության բժշկուհի Սյուզան Ղազարյանը հազարավոր մարդկանց նման սրտի տրոփյունով է հետևել ապրիլյան քառօրյայի լրահոսին: Անկեղծանում է՝ լաց է եղել ամեն մի զոհի ու վիրավորի համար: Ապրումները, հույզերն ու մաղթանքները երիտասարդ բժշկուհին ամփոփեց նամակում, որը ծրարեց` առանց հասցեի ու հանձնեց «Շնորհակալ եմ քեզ, հայ զինվոր» նախաձեռնության կազմակերպիչներին:
«Որոշեցի նամակ գրել ու շնորհակալություն հայտնել, որ ինքը կա ու հսկում է սահմանն ու մենակ չէ. մենք աղոթում ենք իր անվտանգ ծառայության համար»,- նշեց երիտասարդ բժշկուհին՝ ափսոսանք հայտնելով, որ ուշ է իմացել ակցիայի մասին, այլապես նամակից բացի` նաև փոքրիկ նվեր կպատրաստեր:
Սահմանին կանգնած զինվորին շնորհակալություն հայտնեցին նաև երեխաները` ցանկանալով իրենց խոսքով ուրախություն պատճառել զինվորներին։ Նրանց թվում էին 12-ամյա Անուշավանն ու Գարեգինը, որոնք շատ պարզ ու անմիջական նամակ էին գրել.
«Շնորհակալ եմ քեզ, հայ զինվոր, որ օր ու գիշեր հսկում ես մեր անդորրը ու խաղաղությունը: Քո շնորհիվ մենք հանգիստ մեր գլուխը դնում ենք բարձին ու քնում: Բարի ծառայություն»։ Իսկ որպես հետգրություն` ավելացրել էին` դուխով ախպերներ:
civilvoice կազմակերպության նախաձեռնությամբ Գյումրու Թատերական հրապարակում կազմակերպված «Շնորհակալ եմ քեզ, հայ զինվոր» ակցիային միանում էին բոլորը` ահել ու ջահել, ովքեր ոչ միայն անհրաժետ հիգիենայի պարագաներ ու գրքեր էին բերում զինվորների համար, այլև նամակ էին գրում` սիրո ու քաջալերանքի խոսքերով, մաղթանքներով: Իսկ ովքեր նախօրոք չգիտեին ակցիայի մասին, մոտակա խանութներից էին գնումներ կատարում և ուղարկում սահման։
69-ամյա Էմմա տատն ակնոց չուներ, բայց դա չխանգարեց, որ նա էլ իր մաղթանքը թղթին հանձնի՝ երիտասարդներին խնդրեց գրի առնել իր խոսքը. «Անփորձանք ծառայիր ու մորդ մոտ վերադարձիր»:
Նախաձեռնությունը շարունակական է լինելու, վստահեցնում են նախաձեռնության հեղինակները։ Իսկ նախօրեին հավաքված պարագաները և նամակները կտրամադրվեն ԼՂ տարածքում գտնվող N զորամասի զինվորներին:
