ԵՐԵՎԱՆ, 2 հուլիսի — Sputnik. Տավուշի մարզի Ենոքավան գյուղում հուլիսի 2-ին տեղի ունեցավ HayBuis-2016 հայկական խոտաբույսերի երկրորդ փառատոնը:
Միջոցառման ընթացքում տեղի ունեցավ Rope Park-ի բացումը (պարաններով այգի՝ ծառերը միմյանց կապող կախովի հարթակների համակարգ): Տոնի հարյուրավոր մասնակիցներ վայելեցին էքստրիմի հաճույքը:
Ներկաները պարեցին հայկական ժողովրդական պարեր, հյուսեցին ծաղկեպսակներ և համտեսեցին խաղաղության բրդուճը՝ պատրաստված լավաշից, կանաչուց և աշխարհի տարբեր երկրների պանիրների տեսակներից: Բրդուճն ընտանիքի խորհրդանիշն է, իսկ կանաչին խորհրդանշում է հենց կյանքը, պանրի տարբեր տեսակները` աշխարհի երկրները: Դրանք տրամադրել էին Հայաստանում տարբեր երկրների դեսպանատները, որոնք ցանկություն էին հայտնել մասնակցել փառատոնին:
Հյուրերը շատ բան իմացան հայկական խոտաբույսերի և ազգային խոհանոցի քաղցրավենիքի առանձնահատկությունների մասին: Զվարճանքները նախատեսված էին բոլորի համար՝ փոքրից մեծ:
Բացի այդ` Ենոքավանում տեղի ունեցավ ձիերով պոլոյի երկրորդ մրցաշարը:
HayBuis փառատոնի նպատակն է հանրությանը ներկայացնել հայկական խոտաբույսերը, մասնավորապես, Տավուշի մարզի հարուստ բուսական աշխարհը` որպես երկրի քիչ հայտնի ռեսուրսներից մեկը։ Փառատոնի հայեցակարգը կարելի է ներկայացնել հետևյալ արտահայտությամբ. «Պահպանում ենք այն, ինչ սիրում ենք։ Սիրում ենք այն, ինչ մեզ հայտնի է»։
