ԵՐԵՎԱՆ, 2 հուլիսի — Sputnik. Հայաստանի արտաքին գործերի նախարար Էդվարդ Նալբանդյանը ողջունել է Ֆրանսիայի Ազգային ժողովի կողմից Հայոց ցեղասպանությունը ժխտելու փորձերը քրեականացնելը, ասված է ՀՀ ԱԳՆ կայքում։
Նալբանդյանը ողջունել է Ֆրանսիայի կառավարության նախաձեռնած օրինագիծը, որը միաձայն հաստատվեց Ազգային ժողովի կողմից՝ համապատասխան որին փոփոխություններ են մտցվում Ֆրանսիայի Հավասարության և քաղաքացիության օրենքի մեջ՝ քրեականացնելով ցեղասպանությունների, մարդկության դեմ հանցագործությունների ժխտումը և, համապատասխանաբար, նաև՝ Հայոց ցեղասպանության ժխտումը։
«Հուսով ենք, որ Ֆրանսիայի Սենատը ևս կհաստատի այս նախագիծը, և դա կստանա օրենքի ուժ, և այս քայլով Ֆրանսիան ևս մեկ կարևոր, արժեքավոր քայլ կկատարի ցեղասպանությունների, մարդկության դեմ հանցագործությունների կանխարգելման վեհ գործում»,- ասել է Նալբանդյանը:
Հիշեցնենք, որ Ֆրանսիայի խորհրդարանի ստորին պալատի՝ Ազգային ժողովի պատգամավորները նախօրեին երեկոյան միաձայն կողմ քվեարկեցին «Հավասարություն և քաղաքացիություն» օրինագծի`կառավարության առաջարկած փոփոխություններին։ Այդ փոփոխություններով պատիժ է սահմանվում մարդկության դեմ գործված բոլոր հանցագործությունները, այդ թվում` Հայոց ցեղասպանությունը ժխտելու և հերքելու համար:
