ԵՐԵՎԱՆ, 2 հուլիսի-Sputnik. Գերմանիայի և Ռուսաստանի արտգործնախարարներ Ֆրանկ Վալտեր Շտայնմայերը և Սերգեյ Լավրովը հեռախոսազրույցի ընթացքում քննարկել են Ղարաբաղում կարգավորման հեռանկարները՝ հաշվի առնելով գերմանացի նախարարի՝ Երևան և Բաքու կատարած այցերը, հաղորդում է ՌԴ ԱԳՆ մամուլի ծառայությունը:
«Հատուկ ուշադրություն է դարձվել «նորմանդական ձևաչափով» Մինսկի պայմանավորվածությունների կատարմանը` ուկրաինական ճգնաժամի հաղթահարման նպատակով, ինչպես նաև ղարաբաղյան հակամարտության կարգավորման առաջխաղացման հեռանկարները՝ հաշվի առնելով ԵԱՀԿ նախագահի կարգավիճակում գերմանացի նախարարի Երևան և Բաքու կատարած այցերը»,- ասվում է հաղորդագրությունում:
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
