ԵՐԵՎԱՆ, 1 հուլիսի — Sputnik. «Զվարթնոց» միջազգային օդանավակայանում վայրէջք է կատարել ՌԴ արտակարգ իրավիճակների նախարարության ինքնաթիռը, որը 6-րդ չվերթով Հայաստան է տեղափոխել ՀՀ 42 քաղաքացու։ Այս մասին հայտնում է ՀՀ ԱԻՆ-ի մամուլի ծառայությունը։
Օդանավի ուղևորներին դիմավորել են ՀՀ ԱԻՆ Ճգնաժամային կառավարման ազգային կենտրոնի պետ, փ/ծ գնդապետ Հովհաննես Խանգելդյանը, ինչպես նաև՝ տեղում հերթապահող ՀՀ ԱԻՆ բժշկական և հոգեբանական ծառայությունների աշխատակիցները: Օդանավի ուղևորներին ուղեկցում էին ՌԴ ԱԻՆ ներկայացուցիչները` գնդապետ Տ.Ս. Բազդիրևի գլխավորությամբ, ինչպես նաև՝ ՌԴ-ում ՀՀ դեսպանատան ԱԻ ներկայացուցիչ Արտակ Ղազարյանը:
Ընդհանուր առմամբ՝ 6 չվերթով Հայաստան է տեղափոխվել 234 ՀՀ քաղաքացի և հակառակ ուղղությամբ՝ ՌԴ 13 քաղաքացի
Հունիսի 23-ին Վրաստանում գրանցված սելավի հետևանքով փակվել է Ռազմավրացական ճանապարհը, որտեղ կուտակված մարդկանց տարհանումն իրականացվել է Ռուսաստանի և Հայաստանի կառավարությունների միջև կնքված համաձայնագրի շրջանակում։ Բնական աղետի պատճառով այդ ճանապարհահատվածում ավելի քան 200 բեռնատար և 40 մարդատար մեքենա է կուտակվել։
Խցանման վայրում աշխատում են Ռուսաստանի ԱԻՆ-ի հոգեբանները, տեղադրվել են ճանապարհային ոստիկանության և Բժշկական աղետների կենտրոնի շարժական կետեր, որոնք տաք սնունդ և խմելու ջուր են ապահովում։ Ռուսաստանի ԱԻՆ-ի գլխավոր վարչությունը կենսապահովման թաղամասեր է տեղադրել, որտեղ մարդիկ կարող են հանգստանալ, սնվել, բժշկական օգնություն ստանալ և լիցքավորել բջջային հեռախոսները։
