Լաուրա Սարգսյան, Sputnik.
Հայաստանի կառավարությունն այս ամառ ուրախացրեց երկրի բնակչությանը. գազի սակագինն իջավ 9.7 դրամով։ Սակագնի վերանայման հարցը մի քանի անգամ ընդգրկվեց Հայաստանի Հանրային ծառայությունները կարգավորող հանձնաժողովի նիստի օրակարգում, և երկար քննարկումներից հետո կապույտ վառելիքի գինը 1խմ համար 156 դրամից հասավ 146,7 դրամի։
Առաջին հայացքից թվում է, թե գազի գնի իջեցումը պետք է դրական ազդի քաղաքացիների բյուջեի վրա, սակայն փորձագետները հոռետեսական գնահատականներ են տալիս։
«Արտագաղթի, համաշխարհային գործազրկության և աղքատության բարձր մակարդակի պայմաններում սակագնի 9,7 դրամով նվազեցումն այդքան էլ զգալի չէ շարքային քաղաքացու համար»,- Sputnik Արմենիայի թղթակցի հետ զրույցում ասաց տնտեսագետ Վարդան Բոստանջյանը։
Նրա խոսքով` սպառողը նույնիսկ 146,7 դրամ սակագնի դեպքում կրկնակի բարձր է վճարում այն գնից, որը Հայաստանը Ռուսաստանին է վճարում սահմանին։
«Ռուսաստանը մեզ գազ է վաճառում հետևյալ սակագնով` 150 դոլար 1000 խմ համար։ Հետևաբար, «դրամ-դոլար» ընթացիկ փոխարժեքի համաձայն` սպառողի համար 1 խմ գազը կարժենա 72 դրամ։ Ստացվում է, որ պետությունը գազը կրկնակի թանկ է վաճառում բնակչությանը»,- ասաց Բոստանջյանը։
Փորձագետը կարծում է, որ գազի գնի 9,7 դրամով նվազեցումը խորհրդանշական բնույթ է կրում, որովհետև այնքան քիչ գումար է, որ չի կարող լուրջ ազդեցություն ունենալ սպառողի համար։
«Հայաստանի կառավարությունը որոշել է վերջին տարիներին աճող սոցիալական դժգոհությունը հարթեցնել` գազի և էլեկտրաէներգիայի սակագները նվազեցնելու միջոցով», — ասաց Բոստանջյանը։
Հայաստանի շարքային սպառողների համար էլեկտրաէներգիայի սակագինն էլ կնվազի օգոստոսի 1-ից։ ՀՀ Հանրային ծառայությունները կարգավորող հանձնաժողովի որոշմամբ` սահմանված նոր սակագների համաձայն, ցերեկային ժամերին սպառած 1 կվտ/ժ էլեկտրաէներգիան կարժենա 46.2` ներկայիս 48,78-ի փոխարեն, գիշերային ժամերին` 36.2 դրամ` ներկայիս 38,78 դրամի փոխարեն։
Այլ կերպ ասած` սպառողներին վաճառվող էլեկտրաէներգիան կէժանանա 1 կՎտ համար 2,58 դրամով։ Սակայն սպառողների մտահոգությունները չեն փարատվում. օգոստոսի 1-ին ավարտվում է էլեկտրաէներգիայի սակագնի սուբսիդավորման ժամկետը, որը պետությունն իրականացնում էր անցած տարվա թանկացումից հետո։
Բանն այն է, որ մեկ տարի առաջ, երբ էլեկտրաէներգիայի սակագները բարձրացան 7 դրամով, և Հայաստանում հասարակական բողոքի ալիք բարձրացավ, «Հայաստանի էլցանցերի» նոր սեփականատերը որոշեց սուբսիդավորել մինչև 500կՎտ/ժ էլեկտրաէներգիա սպառող քաղաքացիների լրացուցիչ ծախսերը։ Այսինքն, այդ սպառողների համար ողջ տարվա ընթացքում էլեկտրաէներգիայի սակագինը նույնը մնաց` ցերեկային ժամերին նրանք վճարում էին 31,85 դրամ, գիշերային ժամերին` 41,85։
«Եթե կառավարությունը դադարեցնի սուբսիդավորումը, ապա նույնիսկ սակագնի իջեցման դեպքում օգոստոսի 1-ից էլեկտրաէներգիան կթանկանա գրեթե 5 դրամով»,- նշեց Բոստանջյանը։
Փորձագետի խոսքով` ներկա սակագների փոխարեն օգոստոսի 1-ից շարքային քաղաքացիներից շատերը կսկսեն վճարել 36,2 և 46,2 դրամ։
«Եթե համեմատենք ամենահամեստ սպառողի ծախսերը, ապա էլեկտրաէներգիայի սակագնի նվազումն ամսական կտրվածքով թույլ կտա տնտեսել 700-1000 դրամ, ինչը չի կարող լրջորեն ազդել ընտանեկան բյուջեի վրա»,- ասաց Բոստանջյանը։
Էլեկտրաէներգիայի վերջնական սակագինը հայտնի կդառնա կարգավորիչի իրականացրած ուսումնասիրություններից հետո։
